येँया क्वनेलागाय् नेवाःतपाखें १३ गते मसाल जुलुस

वैशाख १४ गते संविधानसभा घेराउ

येँ (सन्ध्या टाइम्स)/येँया क्वःने लागाया नेवाःतय्सं वइगु बैशाख १३ गते क्वःने लागाय् मसाल जुलुस पिकाइ जूगु दु। येँ महानगरपालिका वडा नं. १२, २० ,२१ व २३ वडाय् मसाल जुलुस पिकायेगु धकाः नेवाः स्वायत्त राज्य मंकाः संघर्ष समितिं नीस्वंगु क्वःने लागा समन्वय समितिं क्वःछ्यूगु दु। थ्वहे वइगु वैशाख १४ गते नेवाःतय्सं याइगु संविधानसभा घेराउ ज्याझ्वः ताःलाकेगु निंतिं उगु कथं मसाल जुलुस यायेगु नापं वडा वडाय् ब्यागलं ब्यागलं कथंया प्रचारात्मक ज्याझ्वः यायेगु खँ क्वःछ्यूगु दु। म्हिगः नेवाः स्वायत्त राज्य मंकाः संघर्ष समितिं क्वने लागाया नेवाः खलः पुचः नापं नेवाः ख्यःया न्ह्यलुवातय्त मुंकाः याःगु भेलां मनरत्न शाक्यया संयोजकत्वय् क्वःने लागा समन्वय समिति दयेकूगु खः। उगु समन्वय समितिया छ्यांज्येय् इश्वरदास साय्मि व दांभरीइ उग्रतारा महर्जनयात ल्यःगु दुसा समितिया दुजलय् नीस्वम्ह तःगु दु ।

उगु भेलां येँ महानगरपालिका वडा नं. १२ या कजि कथं विकास डंगोलयात ल्यःगु दुसा अथे हे २१ वडाया नितिं प्रमोद खोखाली, २० वडाया नितिं इश्वर प्रजापति व २३ वडाया नितिं राजुलाल श्रेष्ठयात कजि ल्यःगु दु। अथे हे १२ वडाय् बैशाख ४ गते पदयात्रा, ५ गते नेवाःतय्गु छेँय् छेँय् वनेगु नापं कोणसभा यायेगु ज्याझ्वः दु। उगु हे कथं २०, २१ व २३ वडाय् छसिकथं बैशाख ६, ७ व ८ गते नेवाःतय्गु छेँय् छेँय् वनेगु नापं कोणसभा यायेगु नं घोषणा याःगु दु। नेवाः स्वायत्त राज्य मंकाः संघर्ष समितिया नायः सानुराजा शाक्यया अध्यक्षताय् जूगु उगु ज्याझ्वलय् सभासदपिं तिर्थराम डंगोल, दिलिप महर्जन व नेवाः राष्ट्रिय मुक्ति मोर्चाया उमेश स्थापित व नेवाः जागरण मञ्चया सुजिव बज्राचार्यं न्ववानादीगु खः ।