सुगतरत्न सिन्दुराकारयात मोति पत्रकारिता सिरपाः
यल (सन्ध्या टाइम्स)/थुगुसीया मोति पत्रकारिता सिरपाः झिंखुदँ न्ह्यवंनिसें 'देशय्मरु झ्याः' वाःपौया माध्यमं नेपालभाषा पत्रकारिता ख्यलय् योगदान याना वयाच्वंम्ह पत्रकार सुगतरत्न सिन्दुराकारयात बिउगु दु। दां न्याद्वः नापं हनापौ सहितया उगु सिरपाः म्हिगः ललितपुर बार एसोसियसनया हलय् जूगु छगू समारोहया दथुइ दाता मोतिलाल शिल्पकारं लःल्हानादीगु खः ।
ज्याझ्वलय् मूपाहां नेवाः देय् दबूया संरक्षक मल्ल के. सुन्दरं नेपालभाषा पत्रकारितायात थौंकन्हय् तःधंगु हाथ्या जुयाच्वंगुलिं राज्यं हे सञ्चार ख्यलय् लगानी यायेगु वातावरण दयेकेत नेवाः राज्य दयेमाःगु व उकिया लागिं नेवाःत सकलें जायेमाःगु खँ न्ह्यथनादिल ।
दाता मोतिलाल शिल्पकारं नेवाः संस्कृति म्वाकेत सकसिनं थःथःगु थासं कुतः यायेमाःगु खँ कनादिल। येँपाखें अन्जलीदेवी मास्के, यलपाखें मदनमोहन मिश्र व ख्वपपाखें तेजेश्वरबाबु ग्वंगःयात हनापौ देछासें हनेज्या नं जूगु उगु ज्याझ्वलय् नेवाः प्रेस दबूया छ्याञ्जे विनोद रञ्जितं वार्षिक प्रतिवेदन न्ह्ब्वयादीगु खःसा सम्मानित ब्यक्तित्वपिं तेजेश्वरबाबु ग्वंगः, मदनमोहन मिश्र, अन्जलीदेवी मास्के व सुगतरत्न सिन्दुराकारपिंसं नं थःथःगु नुगः खँ प्वंकादीगु खः। ज्याझ्वः प्रेस दबूया नायः नरेन्द्र श्रेष्ठया सभापतित्वय् जूगु खः। नेवाः प्रेस दबूया न्हापांगु बुदिंया लसताय् थगुने कृष्ण प्रजापतियात न्हापांगु मोति पत्रकारिता सिरपाः बिउगु खः ।
