प्यम्ह च्वमियात पंचवीर सिंह सिरपाः
येँ (सन्ध्या टाइम्स)/बुद्ध संवत् २५५१ व २५५२ या पंचवीर सिरपाः म्हिगः थनया विश्वशान्ति विहारय् छगू ज्याझ्वः यासें लःल्हात। बुद्ध संवत् २५५१स उगु सिरपाः प्रेमलक्ष्मी तुलाधर व मदनमुनि वज्राचार्ययात लाःगु खःसा २५५२ स माया मानन्धर व डा. कविन्द्र वज्राचार्ययात लाःगु खः ।
ज्याझ्वलय् न्ववासें मू पाहां लुम्बिनी विश्वविद्यालयया नवनियुक्त उपकुलपति डा. त्रिरत्न मानन्धरं थःगु कार्यकालय् हे लुम्बिनी विश्वविद्यालय संचालन यायेगु थःगु ताः दुगुलिं उगु ज्याय् ग्वाहालि यानादीत सकसितं इनाप यानादिल।
ज्याझ्वलय् मूपाहां डा. मानन्धरं सिरपाः त्याकूपिंत दसिपौ लःल्हानादीगु खःसा सिरपाःदाता पंचवीर सिंह तुलाधरं दां व उपहार लःल्हानादीगु खः। ज्याझ्वलय् न्ववायेगु झ्वलय् दाता तुलाधरं बुद्धधर्म सम्बन्धी च्वसु अझ यक्व च्वयेत इनाप यासें उकिया सफू पिकायेगु जिम्मा थम्हं काये धयादिल ।
उगु हे झ्वलय् 'सन्ध्या टाइम्स' न्हिपती पिहां वःगु बुद्ध धर्म सम्बन्धी बांलाःगु च्वसुत मुनाः पिथंगु 'पले मिखा' या स्वंगूगु ल्याः नं मूपाहां डा. मानन्धरं विमोचन यानादिल। उगु सफूयात कयाः विवेचना यासें प्रा. प्रेमशान्ति तुलाधरं बुद्ध धर्मया प्रवर्द्धन यायेगु ज्याय् सफुलिं तःधंगु योगदान बीगु बिचाः प्वंकादिल। सफूया सम्पादक रत्नसुन्दर शाक्यं सफू सम्पादन सम्बन्धी थःगु अनुभव कनादिल ।
'सन्ध्या टाइम्स' न्हिपौया सम्पादक सुरेशकिरण मानन्धरं जनआन्देलनं प्राप्त जूगु छगू उपलब्धी मध्ये छगू धर्म निरपेक्षता खःसा थौंकन्हय् उकिया विरुद्ध षडयन्त्र शुरु जूगुलिं बौद्धत सचेत जुइमाःगु बिचाः प्वंकादिल ।
अथे हे सिरपाः त्याकादीपिं प्यम्हं च्वमि भाजु मय्जुपिंसं नं ज्याझ्वलय् थःपिनि लेखन सम्बन्धी अनुभव न्यंकादीगु खः।
लिसें निर्णायकपिनिपाखें रश्मी राजकर्णिकार व मदनरत्न मानन्धरं च्वसुया बारे कनादीगु खः। थुकिया मेपिं निर्णायकत भिक्षु संरक्षित व रीना तुलाधर नं खः ।
ग्वसाः खलः युवा बौद्ध समूहया अध्यक्ष त्रिरत्न मानन्धरं लसकुस यासें न्ह्याःगु उगु ज्याझ्वलय् समूहया उपाध्यक्ष राजा शाक्यं सुभाय् देछानादीगु दु ।
सभाया सभापति भिक्षु ज्ञानपुर्णिक महास्थविरं पुण्यानुमोदन यासें ज्याझ्वः क्वचायेका बिज्याःगु खः। उगु इलय् वसपोलं भगवान बुद्ध नेपालय् जन्म जूगु खःसां झी नेपाःमितय्सं बुद्ध, धर्म व संघयात थःगु यानाः काये मफयाच्वंगु दु धासें थ्व स्वतां थः यानाः कायेत कुतः यायेमाःगु बिचाः प्वंकाबिज्यात ।
