बस व ट्रक ल्वानाः खुम्ह सित
येँ (सन्ध्या टाइम्स)/वंगु चान्हय् मकवानपुरया मनहरी गाविसया चौधकिलो धइगु थासय् यात्रुबाहक बस व अन हे दिकातःगु छगः ट्रक ठक्कर नयाः खुम्ह मनूत सीगु दुसा नीछम्ह घाःपाः जूगु दु ।
येँनं सिन्धुलीया लागिं वंगु बा. २ ख ३३४८ नम्बरया बसं अन हे दिकातःगु ना. ३ ख ४३१३ नम्बरया ट्रकय् ठक्कर नकः वनाः उगु दुर्घटना जूगु खः। दुर्घटना वंगु चान्हसिया १ बजे जूगु खः ।
उगु दुर्घटनाय् लानाः सिन्धुलीया २१ दँ दुम्ह सुनिला अधिकारी, बसया सह चालक वर्दियाया सुरज बुढाथाकी, प्रेम विक नापं खुम्ह मनू सीगु खः। दुर्घटनाय् लानाः सीपिं खुम्ह मध्ये स्वम्हेसिया सनाखत मजूनि धकाः प्रहरीं धाःगु दु ।
उगु दुर्घटना जुइवं हे घटनास्थलय् न्याम्ह यात्रु सीगु खः। घाःपाः जूम्ह अधिकारीयात चितवन मेडिकल कलेज व मेडिकल कलेज भरतपुरय् वासः याकुयाकुं हे मदुगु खँ नं प्रहरीं धाःगु दु। घाःपाः जूपिन्त नं मेडिकल कलेजय् वासः यायेगु ज्या जुयाच्वंगु दु। घाःपाः जूपिनिगु नां व थाय्बाय् धाःसा वःगु मदुनि। उगु दुर्घटना छु गथे जुयाः जूगु धकाः प्रहरीं अनुसन्धान यानाच्वंगु दु ।
