एमाले सभासद्तय्सं प्रमया राजीनामा फ्वन
सत्ता नेतृत्व यानाच्वंगु नेकपा (एमाले)या सभासद्तय्सं प्रधानमन्त्री माधवकुमार नेपालया राजीनमा फ्वंगु दु ।
सिंहदरवर स्थित पुलांगु प्रतिनिधि सभाकक्षय् शनिवाः च्वंगु संसदीय दलया बैठकय् न्ववासें सभासद्तय्सं सहमतिया निंतिं निकास पिकायेत प्रधानमन्त्रीं राजीनमा बीमाःगु माग याःगु खः । प्रधानमन्त्री नेपालं राजीनमा ब्यूसाः वर्तमान राजनीतिक गतिरोध ज्यंकेत अपूइगु तर्क न्ह्यब्वसें बैठकय् न्ववापिं सभासदतय्सं प्रधानमन्त्रीया राजीनामा माग याःगु खः ।
बैठकय् उमलाल कँडेल, विजय पौडेल, राधा ज्ञवाली, रवीन्द्र अधिकारी, रिजवान अन्सारी लगायत सभासतय्सं प्रधानमन्त्री नेपाल नेतृत्वया सरकारं शान्ति प्रकृयायात तार्किक निष्कर्ष थ्यंकेमफइगु व निर्धारित इलय् हे संविधान नं जारी यायेमफइगु खँ धाःगु खः । अथेहे थःगु पार्टी नेतृत्वया सरकार असफल जुइत्यंगु व अथे जुसाः पार्टी हे असफल जुइगु धासें सभासद्तय्सं प्रधानमन्त्रीया राजीनामा माग याःगु खः ।
शनिवाःया बैठकय् न्ववापिं झिंखुम्ह सभासद्त मध्ये अधिकांश नेतातय्सं सरकारया आलोचना याःगु खःसा सभासद् सीता पौडेलं धाःसा सहमतिया निंतिं सरकार बाधक मजुइगु धासें सरकारया बचाउ यानादिल ।
संसदीय दलया दुजःत नापं पार्टीया पदाधिकारीतय्गु नं ब्वति दुगु उगु बैठकय् संविधान निर्माण, हिउँदे अधिवेशनय् पार्टीया भूमिका लगायत विषयलय् नं सहलह जूगु खः । बैठक आइतवाः सुथय् च्यतात्याः इलय् हानं च्वनीगु जूगु दु ।
