संविधानसभाया म्याद तनेत गोप्य सहमति : थापा
राष्ट्रिय प्रजातन्त्र पार्टी नेपालया अध्यक्ष कमल थापां हानं छक्वः स्वंगू तःधंगु दल दथुइ संविधानसभाया म्याद तनेगु गोप्य सहमति जुइधुंकूगु दावी यानादीगु दु । वय्कलं स्वंगू दलं जनतायात झंग ल्हानाच्वंगु द्वपं बियादिसें म्याद तनेगु सहमति असंवैधानिक पलाः जूगु नं धयादिल ।
शनिवाः हेटौंडाय् राप्रपा नेपालं ग्वसाःग्वःगु आमसभाय् न्ववानादिसें वय्कलं न्हूगु संविधान निर्माणया निंतिं राज्यं खुइगु अर्ब खर्च याये धुंकूगु धयादिसें उलीमछि ध्यबा खर्च यानाः नं जेठ १४ गते संविधान जारी यायेमफुपिंत अपराधी धायेमाःगु धयादिल ।
इलय् हे संविधान जारी यायेमफुसाः देय् संकटय् लाइगु ख्याच्वः बियादिसें नेता थापां दक्वं दलत दथुइ सहमति यानाः छप्पँ जुसाः इलय् हे संविधान जारी यायेत आः नं प्रशस्त ई ल्यंदनीगु धयादिल । वय्कलं थःगु प्रतिकूलय् न्हूगु संविधान वइगु जुसां राप्रपा नेपाल इलय् हे संविधान जारी यायेमाःगु पक्षय् दुगु धयादिल ।
