बस दुर्घटनाय् लाना न्याम्ह सित
सुनसरीया हरिपुरय् शनिवाः सुथय् जूगु बस दुर्घटनाय् न्याम्ह सीगु दुसाः पीप्यम्ह घाःपाः जूगु दु । पूर्व-पश्चिम राजमार्ग अन्तर्गतया थुगु सतकय् यात्रुबहाक बस अनियन्त्रित जुयाः सतकं क्वय् कुतुवंनाः दुर्घटना जूगु खः । बसय् न्यय्म्ह स्वयां अप्व यात्रुत दुगु व बस तीव्र गतिलय् ब्वाकेगु झ्वलय् अनियन्त्रित जुयाः दुर्घटना जूगु खँ प्रहरीं धाःगु दु ।
भद्रपुरं जनकपुर पाखे वनाच्वंगु मे. १. ख. ९१२ नम्बरया यात्रुबहाक बस दुर्घटना जुयाः प्यम्ह यात्रुत घटनास्थलय् मदुगु खःसा छम्ह यात्रुयात जिल्ला अस्पताल इनरुवालय् वासः याकातःगु इलय् मदुगु खः । दुर्घटनाय् लाना सुनसरी महेन्द्रनगर-९या झिंस्वदँया मनोज श्रेष्ठ, एकम्बा-५या सञ्जय चौधरी व सप्तरी महादेवपट्टरी-६या झिंन्यादँया शयव मियाँ सीगु खः । मेम्ह निम्हेसिया सनाखत जुइमफुनीगु खँ प्रहरीं धाःगु दु ।
अथेहे दुर्घटनाय् घाःपाः जूपिं नीस्वम्ह यात्रुतय्त वीपी कोइराला स्वास्थ्य विज्ञान प्रतिष्ठान धरनाय् वासः याकातःगु दुसाः मेपिं नीछम्हेसित इनरुवाय् वासः याकातःगु दु ।
