निन्हुया न्हि नं तराईया जनजिवन प्रभावित
मधेशी जनअधिकार फारेमं आह्वान याःगु निन्हुन्यंकया तराई बन्दया निन्हुया न्हि शुक्रवाः नं अनया जनजीवन प्रभावित जूगु दु । फोरमं सरकार व संयुक्त मधेशी मोर्चा दथुइ च्यागू बुँदे सम्झौता व फोरम नाप जूगु नीनिगु बुँदे सम्झौता कार्यान्वयन यायेमाःगु माग यासें बन्दया आह्वान याःगु खः ।
बन्दया झ्वलय् सर्लाहीलय् प्रदर्शन यानाच्वंपिं फोरमया सभासद् सहित पीम्ह कार्यकर्तातय्त प्रहरीं ज्वना यंकूगु दु । शुक्रवाः न्हिनय् पूर्व-पश्चिम राजमार्ग अवरुद्ध यायेत नवलपुरय् प्रदर्शन यानाच्वंपिं फोरमया कार्यकर्तायात चीकेत प्रहरीं लाठीचार्ज नं याःगु खः । लिपाः अन प्रदर्शन यानाच्वंपिं सभासद् सलमा खातुन, फोरम जिल्ला अध्यक्ष अशोक यादव लगायतयात प्रहरीं ज्वना हरिऔन इलाका प्रहरी ज्याकूथी यंकूगु खः । लिपाः प्रहरी शुक्रवाः सनिलय् ज्वनायंकूपिं दक्वसितं त्वःतुगु ख: ।
बन्दया झ्वलय् फोरमया कार्यकर्तातय्सं शुक्रवाः सुथय् वीरगंजय् मधेश बन्दया बारे बुखँ मबीगु धासें कान्तिपुर लगायत थीथी राष्ट्रिय न्हिपौ छ्वयेकूगु दु । थ्वहे दथुइ फोरमया निन्हुन्यंकया लिप्पांगु न्हि शुक्रवाः तराईया थीथी जिल्लाय् बजाः, शिक्षण संस्था, कलकारखाना, यातायात दक्वं पूर्णरूपं ठप्प जूगु खः ।
