'वामदेवं धायेवं सरकार परिवर्तन जुइमखु'
सत्ता नेतृत्व यानाच्वंगु नेकपा (एमाले)या सचिव विष्णु पौडेलं पार्टी उपाध्यक्ष बामदेव गौतमं धायेवं सरकार परिवर्तन मजुइगु खँ धयादीगु दु ।
नुवाकोटया विदुरय् एमालें ग्वसाःग्वःगु पत्रकार सम्मेलनय् वय्कलं गौतमया धापू व्यक्तिगत जूगु धयादिसें निजी धारणां सरकार परिवर्तन जुइगु सम्भावना मदुगु धयादिल । अथेसां वय्कलं एमालेया बैठकं न्ह्यब्वःगु शान्ति व संविधानया मूल मुद्दाय् सहमति जुसाः राष्ट्रिय सरकारया बारे बिचाः यायेफइगु धयादिल ।
छुं नं छगू दलया घोषणा पत्र कथं संविधान निर्माण यायेमज्यूगु धयादिसें नेता पौडेलं छगू जक दलया विषयवस्तुइ केन्द्रित याःसा संविधान जारी यायेत थाकुइगु नं धयादिल । वय्कलं नेपाः व नेपाली जनताया मौलिक हक व अधिकार सहितया संविधान जारी यायेमाःगु बिचाः प्वंकादिल ।
नेता पौडेलं योग्यता पुवंकूपिं माओवादी लडाकुतय्त जक सेनाय् समायोजन यायेफइगु धयादिसें सेना व ल्वाभः व्यवस्थापन शान्ति सम्झौता कथं हे यायेमाःगु खँय् ब: बियादिल । वय्कलं शान्ति व सहमतिया निंतिं विशेष यानाः स्वंगू मुख्य दलत दथुइ परामर्श व वार्ता जुयाच्वंगु धयादिसें दलतय्त जनताप्रति उत्तरदायी जुयाः सरकारयात ग्वाहालि यायेत इनाप यानादिल ।
