भारतीय विदेशमन्त्री नेपाः वःबलय् हे एमआरपीया सहमति

येँ (सन्ध्या टाइम्स)/मेशिन रिडेबल पासपोर्ट (एमआरपी) भारतय् हे छापे यायेमाः धकाः नेपाःयात दवाव बीगु ज्या स्वय्म भारतीय विदेशमन्त्री हे नेपाः वयाः बिउगु खँ सीदुगु दु। भारतीय विदेशमन्त्री एसएम कृष्णा नेपाः वःगु इलय् नेपाःया परराष्ट्रमन्त्री सुजाता कोइरालालिसे जूगु वार्ताय् वय्कलं एमआरपी भारतय् हे छापे यायेमाः धकाः दवाव बियादीगु खः। परराष्ट्रमन्त्री कोइरालां अबलय् हे एमआरपी भारतय् छापे यायेगु धकाः बचं बिउगु खँ नं सूत्रं धाःगु दु। एमआरपी भारतय् छापे यायेगु धकाः अबलय् हे सहमति जुइधुंकूगु कारणं ई मगाःगुलिं जक भारतयात बीमाःगु धकाः त्वह चिनेगु पाय्छि मजूगु खँ सूत्रं धाःगु दु ।

उखे सर्वोच्च अदालतं एमआरपी छापे यायेगु बारे छुं हे प्रक्रिया न्ह्याके मतेनि धकाः सर्वोच्च अदालतं आदेश बिउगुलिं ३० गते तक सरकारं थुकिया बारे छुं हे ज्या मयाइगु खँ धाःगु दु। ३० गते लिपा जक एमआरपी भारतय् छापे यायेगु वा रिटेण्डर तयेगु धइगु बारे निर्णय जुइगु खँ सूत्रं धाःगु दु। एमआरपी छपाईयात कयाः संसदया लेखा समितिइ नं विवाद पिहां वःगु दु ।

३० गते नेपाल बन्द
एमआरपी भारतय् छापे याकेत बियाः नेपाःया गोपनीयता व सुरक्षा खतराय् लाकूगु धासें विपक्षी पार्टी माओवादीं चैत्र ३० गते नेपाल बन्द घोषणा याःगु दु। चैत्र ३० गते सर्वोच्चं थुकिया बारे फैसला न्यंकेगु ई बिया तःगु दु। संसदया निर्देशनयात तकं वास्ता मयासे सरकारं थ्व ज्या याःगु द्वपं माओवादीं बिउगु दु ।