माओवादीया ग्वाहालि दुसाः लछि दुने हे संविधान : सुजाता
उपप्रधान नापं परराष्ट्र मन्त्री सुजाता कोइरालां माओवादीं ग्वाहालि याःसा लछिया दुने हे संविधान निर्माण जुइगु खँ धयादीगु दु ।
शुक्रवाः विराटनगरय् पत्रकारत नाप खँल्हाबंला यानादिसें वय्कलं संविधान निर्माणया न्हय्न्यागू प्रतिशत ज्या सिधेधुंकूगुलिं सहमति जुसाः इलय् हे संविधान जारी यानाः देय्यात निकास बीफइगु धयादिल । वय्कलं प्रतिपक्षी दल माओवादीं चाहे जुसाः संविधान निर्माण यायेत यक्वः ई मकाइगु धयादिसें मन्त्री कोइरालां थुकीयात निंतिं माओवादी ग्वाहालि यायेमाःगु धयादिल ।
कांग्रेस सभापति गिरिजाप्रसाद कोइरालाया निधन लिपा न्हापांगु खुसीइ विराटनगर थ्यंकादिम्ह मन्त्री कोइरालां सहमति, सहकार्य व एकताया संस्कार दयेकेफुसाः देय्यात निकास बीअपुइगु धयादिल । वय्कलं राजनीतिक दलतय्त सहमतिया साथ न्ह्याः वनेत इनाप यानादिसें दक्वं छप्पँ जुसाः इलय् हे शान्ति प्रकृयायात निष्कर्षय् थ्यंकेत व इलय् हे संविधान निर्माण यायेफइगु दावी यानादिल ।
मदुम्ह गिरिजाप्रसाद कोइरालाया अन्तिम चाहना नं शान्ति प्रकृयायात निष्कर्षय् थ्यंकेगु व इलय् संविधान निर्माण यायेगु जूगु व थ्वहे आःया प्रमुख आवश्यता नं जूगु धयादिसें वय्कलं थुकी दक्वं गम्भीर जुयाः लगेजुइमाःगु धयादिल । नापं वय्कलं माओवादीं सरकारयात ग्वाहालि याःसा व उच्चस्तरीय राजनीतिक संयन्त्रयात क्रियाशिल यायेफुसाः दक्वं समस्या समाधान जुइगु विश्वास प्वंकादिल ।
