कांग्रेसया महाधिवेशन भदौलय्
नेपाली कांग्रेसया झिंनिक्वःगु महाधिवेशन भदौलय् जुइगु जूगु दु । महाधिवेशन भदौया निगूगु वालय् यायेगु सहमति जुसां मितिया बारे शुक्रवाः च्वनीगु केन्द्रीय समितिया बैठकं निर्णय याइगु खँ धाःगु दु ।
बिहीवाः सानेपा स्थित कांग्रेसया मुख्यालय् च्वंगु कांग्रेस केन्द्रीय समितिया बैठकय् भदौ ११ निसें १४ तक येँय् झिंनिक्वःगु महाधिवेशन यायेगु सहमति प्वंकुसां थुकीया बारे अन्तिम निर्णय शुक्रवाःया बैठकं याइगु खँ कांग्रेस उपसभापति रामचन्द्र पौडेलं कनादिल, 'भदौया निगूगु वा दुने महाधिवेशन यायेगु बारे सहमति जूगु दु, तर मिति धाःसा शुक्रवाः च्वनीगु बैठकं निर्णय याइ ।'
बैठकय् कार्यवहाक सभापति सुशील कोइरालां पदाधिकारीत नापया परामर्शाया आधारय् भदौ ११, १२, १३ व १४ गते पार्टीया महाधिवेशनया मिति प्रस्ताव यानादीगु खः । केन्द्रीय दुजःतय्सं उगु मिति उपयुक्त जूगु धासें समर्थन याःगु खः । बैठकय् दुजःतय्सं न्ववायेगु ज्या मसिदनीगुलिं शुक्रवाःया बैठकं जक मितिया बारे अन्तिम निर्णय यायेगु खँ क्वःछीउगु खः ।
थ्वस्वयां न्ह्यः फागुनया लिप्पांगु वाःलय् यायेगु धाःगु महाधिवेशन जिल्ला विवादया कारणं स्थगित यायेमाःगु खःसा वयां लिपा महाधिवेशनया न्हूगु मितिया बारे विवाद जुइवं वैशाख वा जेठ यायेमाःगु महाधिवेशनय् सहमति जुइमफुगु खः ।
पार्टी सभापति गिरिजाप्रसाद कोइरालाया निधन लिपाः थौं न्हापांगु पटक कांग्रेस केन्द्रीय समितिया बैठक च्वंगु खः ।
