राष्ट्रिय सहमतिया सरकारयात निंतिं सहलह जारी : खनाल
नेकपा (एमाले)या अध्यक्ष झलनाथ खनालं राष्ट्रिय सहमतिया सरकारया निंतिं सहलह जुयाच्वंगु खँ धयादीगु दु । वय्कलं उच्चस्तरीय राजनीतिक संयन्त्रलय् नं राष्ट्रिय सहमतिया सरकारया बारे सहलह जुयाच्वंगु धयादिल ।
एमालेया न्याक्वःगु जिल्ला अधिवेशनया बिहीवाः सिन्धुलिमाढीलय् उल्लेज्या यानादिसें खनालं राष्ट्रिय सहमतिया सरकारया विकल्प मदुगु धयादिसें सहमतिं हे न्हूगु संविधान व शान्ति प्रकृयायात निष्कर्षय् थ्यंकेफइगु धयादिल । वय्कलं राष्ट्रिय सहमतिया सरकार गठन मजुसाः इलय् हे संविधान जारी यायेथाकुइगु धयादिल ।
एमाले थें माओवादी व कांग्रेसं थःपिनिगु पार्टीगत हठ त्याग याःसा सहमति यायेत अपुइगु धयादिसें अध्यक्ष खनालं माओवादी, कांग्रेस व एमाले छगू हे थासय् च्वंसा दक्वं समस्या समाधान यायेफइगु धयादिल ।
वय्कलं योग्य माओवादी लडाकुतय् सुरक्षा निकायलय् व मेपिंत समाजय् पुर्नस्थापना यायेमाःगु बिचाः प्वंकादिसें गुलिया ल्याख्यय् सुरक्षा निकायलय् समायोजन यायेगु बारे याकनं हे सहमति जुइगु धयादिल । वय्कलं शान्ति प्रकृया पूवंकेत माओवादीं कब्जा यानातःगु छेँबुँ लितबीमाःगु व वाईसीएलया अर्धसैनिक संरचना विघटन यायेमाःगु धयादिल ।
