अनमिनया बारे सरकारया अधिकारीक धारणा माग
व्यवस्थापिका संसद अन्तर्गतया अन्तर्राष्ट्रिय सम्बन्ध व मानवअधिकार समितिं सरकार नाप नेपाः स्थित संयुक्त राष्ट्रसंघीय मिसन अनमिनया बारे सरकारी धारणा फ्वंगु दु ।
बिहीवाः च्वंगु समितिया बैठकय् भारतयात मेसिन रिडेवल पासपोर्ट (एमआरपी) छापे यायेत बीगु बारे स्पष्टिकरण बीत झाम्ह प्रधानमन्त्रीयात अनमिनया बारे आधिकारीक धारणा माग याःगु खः । उगु इलय् प्रधानमन्त्री नेपालं अनमिनया आवश्यकता अझ दुगु खःसा म्याद तनेफइगु धयादिल । वय्कलं थुकीयात बारे सहलह लिपा निर्णय यायेगु धयादिल ।
अथेहे बैठकय् वय्कलं सार्वजनिक लेखा समितिलय् ब्यूगु थ:गु स्पष्टिकरणयात हानं लिसाः कयाः कुटनीटिक व राजनीतिक कारणं भारतयात एमआरपी छापे यायेत बीमाःगु धयादिल । वय्कलं नेपालय् पासपोर्टया आवश्यकता जुइधुंकूगुलिं भारतयात हे छापे याकेगु निर्णया मन्त्रिपरिषद्या बैठकं याःगु धयादिल ।
अथेहे प्रधानमन्त्री नेपालं एमआरपी संचालनया उपकरण व प्राविधिक सहायता बारे प्याकेजय् सहमतिया सम्भावना दुगुलिं भारतयात छपे यायेगु जिम्मा ब्यूगु धयादिल । वय्कलं ई म्हो जूगुलिं सार्वजनिक लेखा समितिया निर्देशन पालना यायेमफुगु नं धयादिल ।
बैठकय् समितिया दुजः नारायणकाजी श्रेष्ठ 'प्रकाशं' सरकारं समितिया निर्देशन विपरीत भारतयात पासपोर्ट छापे याकेब्यूगु निर्णय तत्काल खारेज यायेमाःगु धयादिल । अथेहे मेम्ह दुज: सीपि गजुरेलं प्रधानमन्त्री नेपालं कुटनीतिक कारणं भारतयात छापे याकेमाःगु खँ धयादीगु खँ न्ह्यथंसें कुटनीटिक कारण छु खः धकाः न्ह्यसः तयादिल । नापं गजुरेलं सरकारं भारतयात हे एमआरपी छापे यायेत बीगु निर्णयया ल्यूने भ्रष्टाचार व कमिसन सुलाच्वंगु द्वपं बियादिल ।
