फोरमया तराई बन्दं जनजीवन प्रभावित
सरकारनाप जूगु सहमति कार्यान्वयन यायेमाःगु माग यासें मधेशी जनअधिकार फोरम नेपालं आह्वान याःगु निन्हुन्यंकया तराई बन्दया न्हापांगु न्हि बिहीवाः तराईया जनजीवन प्रभावित जूगु दु ।
तराईया थीथी जिल्लाय् सुथंनिसें फोरमया कार्यकर्तातय्सं बन्द सफल याकेत प्रर्दशन याःगु खः । फोरमया कार्यकर्तातय्सं पूर्व निसें पश्चिम तकया राजमार्गय् च्वनाः नं प्रदर्शन याःगु दु । बन्दया कारणं राजमार्गय् यातायात संचान जूगु मदु ।
बन्दया कारणं तराईया सुनसरी, मोरङ, सप्तरी, सर्लाही, रौतहट, रपन्देही, बाँके लगायत जिल्ला पूर्ण रुपं बन्द जूगु दु । बन्दया कारणं बजाः, यातायात, कलकारखाना दक्वं ठप्प जूगु दु ।
फोरमं थःपिं नाप जूगु माग कार्यान्वयन यायेमाःगु नापं इलय् हे संविधान निर्माण यायेमाःगु, शान्ति प्रकृयायात तार्किक निष्कर्षय् थ्यंकेमाःगु, तराईया शुरक्षा व्यवस्था क्वतुकेमाःगु लगायत माग नं याःगु दु । अथेहे फोरमं वर्तमान सरकार पूर्णरुपं असफल जूगु धासें सरकारयात राजीनमा नं फ्वंगु दु ।
