'एमआरपी भारतयात छापे याकेबीगु निर्णय कार्यान्वयन यायमते'
मेसिन रिडेबल पासपोर्ट (एमआरपी) भारतय् छापे याकेगु सरकारी निर्णय चैत ३० गते तक कार्यान्वयन मयायेत सर्वोच्च अदालतं आदेश ब्यूगु दु ।
बुधवाः थुकीया बारे सुशीला कार्कीया एकल इजलासं अन्तरिम आदेश जारी यासें मन्त्रिपरिषदया चैत ६ गते च्वंगु बैठकं निर्णय याःगु व चैत १० गते जूगु सम्झौता समेत कार्यान्वयन मयायेत निर्देशन ब्यूगु खः । अदालतं रिट निवेदक व सरकारी पक्षयात चैत ३० गते सहलहया निंतिं सःतुगु दु ।
मंगलवाः एमआरपी भारतय् छापे याकेबीगु सरकारी निर्णय विरुद्ध सर्वोच्चय् रिट दर्ता जूगु खः । अधिवक्ता हेममणि साप्कोटां बिना प्रतिस्पर्धा सार्वजनिक खरिद ऐनया विरुद्ध एमआरपी छापे यायेत भारतयात बीगु निर्णय गैरुकानुनी जूगु खँ न्ह्यथंसें रिट दयार यानादीगु खः । भारतयात पासपोर्ट छापे यायेत ब्यूसाः सुरक्षाय् तकं आघात लायेफुगु खँ नं निवेदकं रिटय् न्ह्यथंनातःगु दु ।
सोमवाः सार्वजनिक लेखा समितिलय् प्रधानमन्त्री माधवकुमार नेपालं राजनीतिक व कुटनीतिक दवावया कारणं भारतयात एमआरपी छापे यायेत बीमाःगु स्पष्टीकरण बियादीगु खः ।
