संविधानसभाय् कोइराला सहितया स्वंगू पद खाली
संविधानसभाया बुधवाः च्वंगु बैठकय् सभाध्यक्ष सुभासचन्द्र नेम्वाङं पुलांम्ह प्रधानमन्त्री नापं कांग्रेस सभापति गिरिजाप्रसाद कोइरालाया निधन लिपाः वय्कया पद रिक्त जूगु जानकारी बियादीगु दु । वंगु चैत ७ गते कोइरालाया निधन जुइवं कांग्रेसपाखे समानुपाति निर्वाचन प्रणलीं संविधानसभाय् निर्वाचित जुयादीम्ह कोइरालाया पद खाली जूगु खः ।
थ्वस्वयां न्ह्यः एनेकपा (माओवादी)पाखें पार्टी विभाजन यानाः न्हूगु पार्टी च्याकेवं पार्टी पाखें निष्काषन जूपिं मातृका यादव व जगतप्रसाद यादवया पद नं खाली जुयाच्वंगु खः । माओवादी पाखें निष्काषन जूपिं मातृका व जगतप्रसाद नं समानुपातिक निर्वाचन प्रणाली पाखें संविधानसभाय् थ्यंगु खः । थ्व नापं ६०१म्ह दुज: दुगु संविधानसभाय् स्वंगू पद खाली जूगु दु ।
सभाध्यक्ष नेम्वाङं कोइरालाया निधन लिपाःया वय्कया पद रिक्त जूगु सूचं बीवं बुधवाः च्वंगु संविधानसभाया बैठक क्वचाःगु खः । थ्वनापं संविधानसभाय् छुंनं कार्यसूची मदुगुलिं अनिश्चिकाल तकया निंतिं स्थगित जूगु दु ।
