सर्वस्वीकार्य व्यक्ति प्रधानमन्त्री : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं माओवादी नेतृत्वया राष्ट्रिय सहमतिया सरकार गठन जुसाः पार्टीं सर्वस्वीकार्य व्यक्तियात प्रधानमन्त्रीया कथं न्ह्यने हइगु खँ धयादीगु दु ।
नेपाल पत्रकार महासंघ गुल्मीं बुधवाः ग्वसाःग्वःगु पत्रकार नापलायेगु ज्याझ्वलय् नेता भट्टराईं आः हे सु प्रधानमन्त्री जुइ धकाः क्वःछीगु बांलागु खँ मखुगु धयादिसें न्हापा सरकारया बारे निर्णय जुमाः अले सर्वस्विकार्य व्यक्तियात प्रधानमन्त्रीया कथं ह्येफइगु धयादिल ।
वय्कलं राष्ट्रिय सहमतिया सरकार गठन जुसाः छवाःया दुने हे न्हूगु संविधान जारी यायेफइगु दावी यानादिल । न्हूगु संविधान व राष्ट्रिय मंकाः सरकारया निंतिं र्वतमान सरकार बाधक जूगु द्वपं बियादिसें नेता भट्टराईं थ्व सरकारं तत्काल राजीनमा यानाः शान्ति प्रकृया व न्हूगु संविधान निर्माणया निंतिं राष्ट्रिय सरकार गठन यायेमाःगु धयादिल ।
न्हूगु संविधान जारी यायेत दुईतिहाई मत आवश्यक जुइगु तर थ्व सरकार बहुमतया जक जूगुलिं आःया पीगुन्हु दुने न्हूगु संविधान जारी यायेत राष्ट्रिय सरकारया आवश्यकता जूगु बिचाः वय्कलं प्वंकादिल । वय्कलं राष्ट्रिय सरकार गठन जुसाः सेना समायोजन, राज्यया पुनर्संरचना लगायत विषयलय् नं सहमति यायेत अपुइगु धयादिल ।
