सेनां प्रमाण नष्ट याःगु संसदीय समितिया दावी
व्यवस्थापिका संसदया महिला व बालबालिका समितिं बर्दियाया बाँसपानीलय् छम्ह मचा नापं स्वम्ह मिसायात स्याःगु घटना रहस्यमय जूगु धासें सेनां प्रमाण नष्ट याःगु दावी याःगु दु ।
संसदीय समितिं घटनास्थलय् वनाः याःगु अध्ययन अनुसन्धान लिपा बुधवाः पिथंगु प्रारम्भिक प्रतिवेदनय् घटना रहस्यम जूगु खँ न्ह्यथंनातःगु दु । घटनास्थलय् घटना जुइवं प्रहरीयात थःगु कथं तयार याःगु विवरणय् सेनां ल्हाःचिं याकूगु खँ प्रतिवेदनय् न्ह्यथंनातःगु दु ।
समितिं मिसातय्त बलात्कार नं याःगु जुइफुगु आशंका याःगु दु । तर बलात्कार जूगु वा मजूगु बारे पुष्टी यायेगु ठोस आधार मदुगु खँ धाःगु दु । प्रतिवेदनय् घटनाया प्रकृति स्वयेवलय् सीपिं वनय् काउलो काःवंगु व घटनास्थल निकुञ्ज खः वा राष्ट्रिय वन खः धइगु अन्यौल जूगुलिं उमित स्याः हे माःगु स्थिति मदुगु खँ न्ह्यथंनातःगु दु ।
सेनां धाःसा शिकारीतय्सं गोली क्येकेवं प्रतिकार स्वरुप फायरिङ याःगु इलय् उपिं सीगु आधिकारिक धारणा सार्वजनिक याःगु खः ।
थ्वस्वयां न्ह्यः राष्ट्रिय मानवअधिकार आयोगं पिथंगु प्रतिवेदनय् नं सेनां दोषी जूगु ठहर यासें फौजदारी मुद्दा चले यायेत माग याःगु खः । अथेहे मानवअधिकारवादी संस्था इन्सेकं पिथंगु प्रतिवेदनय् नं सेनां मिसातय्त बलात्कार यायेधुंकाः स्याःगु खँ न्ह्यथंनातःगु दु ।
