सामान्य बुहमतया सरकारया औचित्य मदु : शेरचन
एकीकृत नेकपा (माओवादी)या स्थायी समिति दुजः अमिक शेरचनं संविधान जारी यायेत संसदया दुईतिहाइ मत आवश्यक जूगु धयादिसें सामान्य बहुमतया सरकारया औचित्य मदुगु खँ धयादीगु दु । वय्कलं माओवादीयात ३०१ म्त हयाः सरकार गठन यायेत थाकू मजूगु धयादिसें तर अथे यानाः गठन जूगु सरकारया औचित्य मदइगु धयादिल ।
बुधवाः बेनीलय् क्रान्तिकारी पत्रकार संघं ग्वसाःग्वःगु पत्रकार नापलायेगु ज्याझ्वलय् नेता शेरचनं संविधानसभाया समितितय्सं मस्यौदा तयार यायेधुंकूगुलिं राजनीतिक दलतय् इच्छाशक्ति दुसाः निवाःया दुने हे संविधान जारी जुइफइगु दावी यानादिल ।
वय्कलं न्हूगु संविधान जारी यायेत व शान्ति प्रकृयायात पूवंकेत राजीनामा बियाः लँपू चायेकेत वर्तमान सरकारयात इनाप यानादिल । नापं वय्कलं वर्तमान सरकारया पलेसाः माओवादी नेतृत्वया राष्ट्रिय सहमतिया सरकार गठन जुइमाःगु धयादिल ।
