स्वंगू दल संविधान निर्माणया विपक्षय् : महतो
स्वतन्त्र मधेस देशया माग यानाः आन्दोलन यायेगु ख्याच्वः
सदभावना पार्टीया अध्यक्ष राजेन्द्र महतों स्वंगू प्रमुख दल न्हूगु संविधान निर्माणया विपक्षय् जूगु द्वपं बियादीगु दु ।
मेचीकाली मधेस स्वाभिमान यात्राया झ्वलय् राजविराजय् थ्यंकादीम्ह महतों बुधवा: पत्रकारत नाप खँल्हाबंला यानादिसें संविधानसभाय् दुथ्याःगु स्वंगू तःधंगु दल माओवादी, कांग्रेस व एमाले याके संविधान च्वयेगु मनसाय खनेमदुगु धयादिल । वय्कलं संविधान निर्माण यायेत म्हो जक ई ल्यं दनिसां कांग्रेस व एमाले सरकार बचे यायेत व माओवादी सरकार क्वःथलेत व्यस्त जूगु धयादिल ।
आपूर्ति मन्त्री नं जुयादीम्ह महातों न्हूगु संविधानं संघीय व्यवस्था सुनिश्चित यायेधुंकूगु व मधेस प्रदेश निर्माण जुइगु निश्चित जूगुलिं थ्व वातावरण स्यंकेत स्वंगू तःधंगु दल थीथी बहानय् संविधान निर्माण मयायेगु षड्यन्त्रय् लगे जूगु द्वपं बियादिल । मधेसीत समग्र मधेस प्रदेशया पक्षय् दुगु धयादिसें वय्कलं मधेशीतय् चाहना कथं प्रदेश निर्माण मजुसाः स्वतन्त्र मधेस देशया माग ज्वनाः निर्णायक आन्दोलन यायेगु ख्याच्वः नं बियादिल ।
