माओवादीं देय्न्यंक जनप्रदर्शन
जनआन्दोलन दिवसया लसताय् एकीकृत नेकपा (माओवादीं) देय्न्यंक जनप्रदर्शन याःगु दु । माओवादी येँ लगायत देय्या थीथी थासय् विसाल जुलुस व जनसभा याःगु दु । २०४६ सालय् जनआन्दोलन उत्कर्षय् थ्यंगु व २०६२सालया जनआन्दोलनय् सुरू जूगु न्हियात जनआन्दोलन दिवस कथं न्यायेकेगु या । एमाले व कांग्रेसं धाःसा चैत २६ गते थ्व दिवस न्यायेकेगु यानावयाच्वंगु दु ।
जनआन्दोलन दिवसया लसताय् माओवादीं मंगलवाः येँया खुल्लामञ्चय् छगू तःधंगु जनसभाया यात । उगु सभायात माओवादी अध्यक्ष पुष्पकमल दाहाल 'प्रचण्ड', स्थायी केन्द्रीय दुजः हिसिला यमी, नवराज सुवेदी, नेवाः राज्य समितिया इन्चार्ज हितमान शाक्य, निर्माता/निर्देशक युवराज शर्मा लगायतं सम्बोधन यानादीगु खः । नेवाः राज्य समितिया ग्वसालय् जूगु उगु सभाय् ब्वति कायेत येँ, यल व ख्वपःया थीथी थासं लखौं मनूत खुल्लामञ्च थ्यंकूगु खः ।
अथेहे माओवादीं स्वनिगलं पिने विराटनगर, नवलपरासी, मोरङ, नुवाकोट, मकवानकुर, गुल्मी, गोरखा, पाल्पा, दोलखा, रामेछाप, रोल्पा नापं थीथी जिल्लाय् जनसभाया ग्वसाःग्वःगु खः । गुल्मी जूगु जनसभाय् उपाध्यक्ष डा. बाबुराम भट्टराई, गोरखाय् जूगु सभायात मेम्ह उपाध्यक्ष नारायणकजी श्रेष्ठ 'प्रकाश' व मकवानपुरय् महासचिव रामबहादुर थापा 'बदालं' सम्बोधन यानादीगु खः ।
अथेहे विराटनगरय् सचिव सीपि गजुरेल, नवलपरासीलय् प्रवक्ता दिनानार्थ शर्मा, रोल्पाय् वर्षमान पुन 'अनन्त', नुवाकोटय् पोष्टबहादुर बोगती, दोल्खाय् केन्द्रीय दुजः नापं तामाङ राष्ट्रिय मुक्ति मोर्चाया अध्यक्ष कमानमानिसंह लामा, मन्थलीइ पोलिटब्यूरो दुजः अग्निप्रसाद सापकोटा आदिं सम्बोधन यानादीगु खः ।
जनसभाय् न्ववापिं अधिकाशं नेतातय्सं माओवादीयात अझ नं जंगलय् छ्वयेकु कुतः जुयाच्वंगु खँ धाःगु ख: । अथेहे सरकारं इलय् हे संविधान निर्माण यायेमबीगु षड्यन्त्र यानाच्वंगु धासें इलय् संविधान निर्माण मजुसाः जनविद्रोह यायेगु ख्याच्वः नेतातय्सं ब्यूगु ख: ।
