माओवादी भारत विरोधी मखु : प्रचण्ड
सेना व माओवादी देय्या स्वाधिनताया निंतिं छप्पँ जुइमाः
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' माओवादी भारत विरोधी मजूगु खँ धयादीग दु । जनआन्दोलन दिवसया लसताय् माओवादीं येँया खुल्लामञ्चय् याःगु आमसभाय् वय्कलं माओवादीयात भारतविरोधी शक्तिया कथं म्हसिकेत स्वयाच्वंगु धयादिसें भारत प्रति थःपिनिगु छुं नं बैरभाव मदुगु धयादिल । वय्कलं थःपिनिगु आन्दोलन भूतप्रेत विरुद्ध जूगु नं धयादिल ।
अध्यक्ष प्रचण्डं गणतन्त्र, धर्मनिरपेक्षता व संघीयता सुनां नं चाहे जुयाः हिलेमफइगु धयादिसें सरकारय् च्वंपिं दलतय्सं हिन्दु राज्यया नारा बीया माओवादी विरोधी ज्या यायेत अभिप्ररित यानाच्वंगु द्वपं बियादिल ।
वय्कलं वर्तमान सरकार क्वःथलेत लखौं जनता सतकय् कुतहेगु ख्याच्वः बियादिल । थौं आन्दोलनया लिप्पांगु न्हि मखुगु धयादिसें प्रचण्डं बैशाष १८ गते थ्वस्वयां अप्व जनता सतकय् वइगु व उकीया नेतृत्व माओवादीं याइगु धयादिल । नापं वय्कलं उगु इलय् २०४६ सालया जनआन्दोलन व २०६२/६३या जनआन्दोलनय् स्वयां अप्व मनूत सतकय् वइगु दावी यानादिल ।
न्हय्न्यागूलिं जिल्लाय् सुरु जूगु आन्दोलन निर्णायक विन्दुलय् मथ्यंसें सिमधइगु दावी यानादिसें अध्यक्ष प्रचण्डं थौं थीथी जिल्लाय् न्हापा लिपाया स्वयां अप्व जनता कुहांवःगु दावी यानादिल । वय्कलं नागरिक सर्वोच्चता, राष्ट्रिय स्वाधीनता बारे माओवादीं ल्ह्वंगु माग आः दक्वसियां मंकाः माग जुइधुकूगु धयादिल ।
माओवादी आन्दोलनयात शासकतय्सं न्ययनेगु पलेसा निरन्तर राष्ट्रघाती ज्या यानावंगुलिं जनतां थ्व सरकारयात तिरस्कृत व बहिष्कृत यानाच्वंगु खँ वय्कलं धयादिल । नापं प्रचण्डं थ्व सरकारयात जनतां झीगु सरकार मखु धकाः धायेधुंकूगु दावी यानादिल ।
वय्कलं वर्तमान सरकार रिमोट कन्ट्रोल व आकाशवाणी पाखें चलेजूगु धयादिसें थ्व सरकार पाखें शान्ति प्रकृया व संविधान निर्माण असम्भव जूगु धयादिल । वय्कलं व कतामरी सरकार विगठन जुयाः न्हूगु राष्ट्रिय सहमतिया सरकार मजुतल्ले आन्दोलन मदीगु धयादिल । नापं वय्कलं माओवादी नेतृत्वया सरकार गठन जुसाः लछि दुने हे शान्ति प्रकृया व संविधान निर्माण जुइगु दावी यानादिल ।
अथेहे वय्कलं माओवादीयात हानं जंगलय् छ्वयेगु षड्यन्त्र जुयाच्वंगु धयादिसें आः जंगल माओवादी मखु माओवादी विरोधीत वनीगु धयादिल । वय्कलं नेपाली सेना नाप माओवादीया छुंनं कथंया वैरभाव मदुगु धयादिसें बरु सेना माओवादी आः नं ल्वायेत तयार जूगु खँ न्यनाःगु धयादिल । वय्कलं आःया इलय् सेना व माओवादी देय्या स्वाधिनताया निंतिं छप्पँ जुइमाःगु धयादिल ।
