जनजाति महासंघया अध्यक्षय् लेखी
नेपाल आदिवासी जनजाति महासंघया अध्यक्षय् राजकुमार लेखी निर्वाचित जुयादीगु दु । थारु कल्याणकारिणी सभाया महासचिव लेखीं स्वीछगू मत हयादीगु खःसा वय्कया प्रतिद्वन्दी राजबहादुर राईं नीनिगू जक मत हयादीगु खः । कुल न्यय्खुगू मत कुतुवंगु मध्ये स्वंगू मत बदर जूगु ख: ।
अथेहे उपाध्यक्षय् तासी स्याङबो गुरुङसेनी, जिनी याख व नोर्वु घले निर्वाचित जूगु दु । महासंघया न्हूगु कार्यसमिति कथं महासचिवय् आङकाजी शेर्पा, कोषाध्यक्षय् डण्डु शेर्पा दुसाः सचिवय् विमला सुनुवार, चित्रबहादुर राजी लगायत दु ।
मंगलवाः सुथय् निर्वाचनया परिणम वयेवं च्वंगु न्हूगु कार्यसमितिया बैठकं इलय् हे संविधान निर्माण यायेत व न्हूगु संविधानय् आदिवासी जनजातिया अधिकार सुनिश्चित यायेत थीथी राजनीतिक दल व सरकारयात दबाव बीगु ज्याझ्वः यायेगु निर्णय याःगु दु ।
स्वन्हु तक न्ह्याःगु महासंघया न्हय्क्वःगु अधिवेशनय् देय्न्यंकया न्यासः स्वयां अप्व प्रतिनिधितय् ब्वति दुगु खः ।
