फोरमं तराईया जिल्ला प्रशासन घेराउ

मधेशी जनअधिकार फोरमं यानाच्वंगु निक्वः आन्दोलन अन्तर्गत मंगलवाः तराईया जिल्ला प्रशासन ज्याकू घेराउ याःगु दु । घेराउया कारणं कर्मचारीत ज्याकूथी दुहांवनेमफेवं दक्वं सेवाग्राही ज्याखँ पूर्णरुपं ठप्प जूगु दु ।

ज्याकू सुरु जुइगु ई स्वयां न्ह्यः हे गांगांमं वःपिं फोरमया कार्यकर्तातय्सं जिल्ला प्रशासन ज्याकू घेराउ याःगु खः । प्रशासन घेराउयात हे ध्यानय् तयाः सप्तरी, सुनसरी लगायत तराईया जिल्लाय् आपालं जनपद व सशस्त्र प्रहरी परिचालन याःगु खः ।

फोमरं मधेश आन्दोलन लिपा तत्कालीन सरकार नाप जूगु सम्झौता कार्यान्वयन यायेमाःगु व राष्ट्रिय सरकारया गठन यायेमाःगु माग यासें आन्दोलन यानाच्वंगु दु ।