संविधानसभाया म्याद खुलाः तनेमाः : गिरी
नेपाल सदभावना आनन्दीदेवी पार्टीया अध्यक्ष सरिता गिरीं निलाःया दुने छुं नं हालतं संविधान निर्माण यायेफइगु अवस्था मदुगु धयादिसें संविधानसभाया म्याद खुलाः तनेमाःगु खँ धयादीगु दु ।
रिपोटर्स क्लब पर्सां मंगलवाः वीरगंजय् याःगु साक्षात्कार ज्याझ्वलय् गिरीं हथाय्सं संविधान च्वयेगु ज्या जुसाः व पूमवनीगु धयादिसें जनतया दक्वं आशा व चाहनायात सम्बोधन यानाः बांलाक संविधान च्वयेमाःगु धयादिल । वय्कलं अथे यायेमफुसाः निदँया दुने हे हानं द्वन्द्व ब्वलनीगुलिं अज्याःगु संविधानया छुं अर्थ मदइगु धयादिल ।
वर्तमान सरकार राष्ट्रिय सहमति निर्माण यायेत पूर्णतया विफल जूगु व थ्वहे सरकारया कारणं शान्ति प्रकृया व संविधान निर्माण यायेगु ज्या अवरुद्ध जूगुलिं सदभावनां सरकारयात ब्यूगु समर्थन लितकाःगु धयादिल । नापं वय्कलं थ्वहे सरकारया इलय् मिसा विरुद्ध हिंसा व अपराध अप्वःगु व मधेशया शान्ति सुरक्षाया अवस्था नं स्यंगु द्वपं बियादिल ।
अथेहे वय्कलं वर्तमान गठबन्धन सरकारं गणतन्त्र सुदृढिकरण सम्बन्धि छुं ऐन अन्तर्गत संविधानसभाया सभासद्तय्त ह्विप लागू यायेगु ऐन पारित यानाः संविधानसभाया औचित्यय् न्ह्यसः थनेगु ज्या याःगुलिं नं सरकारयात ब्यूगु समर्थन लितकयाःगु धयादिल ।
