पार्टी दुने एकता जुइमाः : सुजाता
उपप्रधानमन्त्री नापं नेपाली कांग्रेसया केन्द्रीय दुजः सुजाता कोइरालां पार्टी दुने नेतातय् थःथःगु बिचाः दुसां पाटी दुने एकता जुइमाःगु खँ धयादीगु दु । नापं वय्कलं नेतातय् धापू पाःसां पार्टी दुने सहलह लिपाः पार्टीया धारणा छगू हे जुइमाःगु धयादिल, 'नेतातय् थःथःगु बिचाः जुइफु, तर पार्टीया धारणा छगू हे वयेमाः ।'
सोमवाः येँय् जूगु छगू साक्षात्कर ज्याझ्वलय् कोइरालां कांग्रेसया स्वम्ह नेतात सुशील कोइराला, शेरबहादुर देउवा व रामचन्द्र पौडेल प्रति धःगु विश्वास दुगु धयादिल । वय्कलं स्वम्ह नेतातय्सं याःगु संघर्ष, योगदान व अनुभवया आधारय् वय्कपिं सक्षम नेतात जूगु धयादिल । अथेहे वय्कलं कांग्रेस सभापति गिरिजाप्रसाद कोइरालां अन्तिम ई तक धयादीगु संवाद, सहमति व एकता पाखें थःपिं न्ह्याः वनेमाःगु खँय् बः बियादिल ।
कोइरालां दलत सत्ता केन्द्रित जूगुलिं संविधान च्वयेगु व शान्ति प्रकृया लिबानाच्वंगु धयादिसें दलगत स्वार्थ स्वयां पिने वनाः संविधान निर्माणय् इमान्दार जुयाः इलय् हे संविधान निर्माण व शान्ति प्रकृयायात निष्कर्षय् थ्यंकेमाःगु धयादिल ।
वय्कलं उच्चस्तरीय राजनीतिक संयन्त्रयात सक्रिया दयेकाः सहमति यानाः न्ह्याः वंसाः राजनीतिक गतिरोध अन्त्य जुइगु दावी यानादिल । अथेहे वय्कलं संविधान च्वयेगु इलय् सरकार परिवर्तन यायेमज्यूगु धयादिसें सरकार क्वःथलेत स्वःसा अस्थितरता ब्वलनीगु धयादिल ।
