सम्झौता कार्यान्वयन मजुसाः सरकार त्वःतेगु : महतो
सद्भावना पार्टीया अध्यक्ष नापं आपूर्ति मन्त्री राजेन्द्र महतों मधेशवादी दलत नाप जूगु सम्झौता पूमवंसाः थःगु पार्टीं सरकार त्वःतेगु ख्याच्वः बियादीगु दु । नपां वय्कलं सम्झौता कार्यान्वयन यायेगु खँय् छुं षड्यन्त्र जुसाः थःपिं सरकार त्वःता सतकं निर्णायक आन्दोलन यायेगु धयादिल ।
विराटनगरय् जूगु छगू पत्रकार सम्मेलन् वय्कलं मधेश स्वायत्त प्रदेश लगायत मधेशवादी दल नाप जूगु च्यागू बुँदे सम्झौतायात न्हूगु संविधानय् दुथ्याकेमाःगु धयादिसें अथे मजुसाः सद्भावनां पार्टीं सरकार, सदन व सतकं संघर्ष यायेगु धयादिल ।
मधेशया मागयात पूवंकेत मधेशवादी दलत दथुइ एकता आवश्यक जूगु खँय् बः बियादिसें मन्त्री महतों स्वंगू तःधंगु दलत माओवादी, कांग्रेस व एमाले मधेशीतय्त अधिकार बी चाहे मजूगु द्वपं बियादिल । अथेहे वय्कलं माओवादी संविधान निर्माण यायेगु स्वयां सत्ताय् वनेगु पाखे लगेजूगुलिं देय् जटिल अवस्थाय् थ्यंगु द्वपं बियादिसें माओवादीं नेपाः व भारतया स्वापू स्यंकेत स्वःगु द्वपं नं बियादिल ।
