संविधान विरुद्ध सरकारं षड्यन्त्र यानाच्वंगु दु : यादव
मधेशी जनअधिकार फोरमया अध्यक्ष उपेन्द्र यादवं वर्तमान सरकार संविधान मदयेकीगु षड्यन्त्रय् लगे जुयाच्वंगु द्वपं बियादीगु दु । वय्कलं थ्व सरकार इतिहासया हे दलकय् ज्यालगे मजूगु सरकार जूगु धयादिसें प्रधानमन्त्री माधवकुमार नेपालया राजीनामा नं माग यानादिल ।
मधेशी जनअधिकार फोरमं सप्तरीया राजविराय् सोमवाः ग्वसाःग्वःगु पत्रकार सम्मेलनय् वय्कलं मधेस लगायत थीथी कथंया आन्दोलनयात सम्बोधन यायेत व शान्ति प्रकृयायात निष्कर्षय् थ्यंकेत अविलम्ब राष्ट्रिय सरकार गठन यायेमाःगु खँय् बः बियादिल । वय्कलं थःपिं नाप न्हाप जूगु सहमति कार्यान्वयन यायेत व इलय् हे संविधान निर्माणया निंतिं राष्ट्रिय सरकार हे आवश्यक जूगु धयादिल । वय्कलं राष्ट्रिय सरकार गठन मजुसाः देशय् तःधंगु समस्या वयेफुगु ख्याच्वः नं बियादिल ।
अथेहे वय्कलं दक्वं दल संविधान निर्माणया निंतिं लगे जुइमाःगु अवस्थाय् स्वंगू दल जक च्वनाः सहलह याःगु प्रति असहमति प्वंकादिल । नपां वय्कलं थःपिनिगु माग पूमवंसाः चैत २६ व २७ गते मधेश बन्द लिपाः सशक्त आन्दोलन यायेगु ख्याच्वः बियादिल ।
पत्रकार सम्मेलनय् फोरमया सहअध्यक्ष जयप्रकाश प्रसाद गुप्तां पार्टीतय्सं न्हापा याःगु गल्तीयात आः राष्ट्रपति डा. रामवरण यादवं ययेत स्वयाच्वंगु धयादिल । वय्कलं नं दक्वं दल मिले जुयाः देय्या समस्या समाधान यायेमाःगु थासय् स्वंगू दल जक च्वना सहलह याःगु प्रति आपत्ति प्वंकादिल ।
