राजनीतिक दबावया कारणं भारतयात एमआरपी : प्रम
प्रधानमन्त्री माधवकुमार नेपालं राजनीतिक दबाव व कुटनीतिक स्वापूया कारणं मेसिन रिडेवल पासपोर्ट (एमआरपी) भारतयात छापे यायेत बीगु निर्णय यानाःगु खँ धयादीगु दु ।
सोमवाः सार्वजनिक लेखा समितिलय् स्पष्टिकरण बियादिसें प्रधानमन्त्री नेपालं भारत नापया ताःहाकगु स्वापू व राजनीतिक दबावया कारणं सरकारं अज्याःगु निर्णया यायेमाःगु धयादिल । वय्कलं एमआरपी भारतयात छापे याकेबीगु निर्णय नियम कानुन कथं हे जूगु धयादिसें सुरक्षा सम्बन्धी संवेदनशीलताया कारणं भारत सरकारं सरकारी छापाखानाय् हे एमआरपी छोपे याकीगु जानकारी ब्यूगु नं धयादिल ।
अथेहे प्रधामन्त्री नेपालं ई अभावया कारणं समितिया निर्देशन कथं टेण्डर प्रकृयायात न्ह्याके मफुगु धयादिल । बैठकय् समितिया दुजःतय्सं खरीद बिक्रि ऐन विपरीत भारतयात हे एमआरपी छापे याके बीगुया कारणं देय्यात आर्थिक रुपय् घाटा जुइगु, टेण्डर रद्द यायेगुया कारण, समितिया निर्देशन अवज्ञा, समितिया दुजःतय् औचित्य प्रति मन्त्रीतय्सं ल्ह्वनाच्वंगु अभिव्यक्तिया बारे प्रधानमन्त्री नाप स्पष्टिकरण काःगु खः ।
समितिं धाःसाः प्रधानमन्त्रीया स्पष्टिकरणं थःपिं सन्तुष्ट मजूगु खँ धाःगु दु । नापं समितिया शुक्रवाः च्वनीगु बैठकं निर्देशनात्मक निर्णय याइगु खँ धाःगु दु । सार्वजनिक लेखा समितिया निर्देशन विपरित मन्त्रिपरिषद्या चैत ६ गते च्वंगु बैठकं एमआरपी भारतय् हे छापे याकेत परराष्ट्र मन्त्रालययात निर्देशन ब्यूगु खः ।
