राष्ट्रपति यादवं प्रमुख दलया शीर्ष नेतात नाप परामर्श
राष्ट्रपति डा. रामवरण यादवं आइतवाः स्वंगू प्रमुख राजीनितिक दलया शीर्ष नेतात नाप परामर्श यानादीगु दु । राष्ट्रपति यादवं राष्ट्रपति भवन शितल निवासय् छगू बेली भ्वाय् सःता माओवादी अध्यक्ष पुष्पकमल दाहाल 'प्रचण्ड', कांग्रेस कार्यवहाक सभापति सुशील कोइराला व एमाले अध्यक्ष झलनाथ खनाल नाप राजनीतिक परामर्श यनादीगु खः । उगु इलय् मानवअधिकारवादी नेतात पद्मरत्न तुलाधर व दमननाथ ढुङ्गानाया नं ब्वति दुगु खः ।
परामर्शय् राष्ट्रपति यादवं विवादित राजनीतिक विषययात उच्चस्तरीय राजनीतिक संयन्त्र पाखें मिलेयायेत नेतातय्त इनाप यानादिल । नापं वय्कलं शान्ति व संविधान निर्माणय् गम्भीर जुयाः न्ह्याः वनेत व इलय् हे संविधान जारी यायेगु निंतिं सहमतिया आवश्यकता दुगुलिं दलतय्त सहमति यानाः न्ह्याः वनेत इनाप यानादिल ।
उगु इलय् स्वंगूलिं प्रमुख दलया शीर्ष नेतातय्सं थःपिं शान्ति व संविधानया निंतिं गम्भीर जूगु खँ न्ह्यथंसें सहमति यानाः निर्धारित इलय् हे संविधान निर्माण यायेगु प्रतिबद्धता प्वंकूगु खः ।
