कांग्रेस दुने नं सरकार परिवर्तनया माग
सत्तारुढ नेकपा (एमाले) दुने थःगु हे नेतृत्वय् दुगु सरकार क्वःथलेत हस्ताक्षर अभियान नापं न्ह्याःगु बुखँ पिहांवःगु इलय् हे मेगू सत्तारुढ दल नेपाली कांग्रेस दुने नं सरकार परिवर्तनया एजेण्डां प्रवेश याःगु दु । आइवताः च्वंगु कांग्रेसया संसदीया दलय बैठकय् सभासद्तय्सं वर्तमान सरकार प्रति कडा असन्तुष्टि प्वंकूसें सरकार परिवर्तनया माग याःगु खः ।
बैठकय् सभासद्त केशवकुमार बुढाथोकी, कुमार राई लगायत सभासद्तय्सं असफल जुइधुंकूगु वर्तमान सरकारयात समर्थन यानाच्वंसाः थःगु पार्टीयात हे घाटा जुइगु धासें सरकारयात ब्यूगु समर्थन तत्काल लित कायेमा:गु माग याःगु दु ।
अथेहे सभासद्तय्सं थःगु दलया मन्त्रीतय् ज्या प्रभावकारी मजुसां पार्टीं छुं नं च्यूताः मप्वंकूगु प्रति असन्तुष्टि नं प्वंकूगु दु । नापं एमालें एकलौटी सरकार थें ज्या यानाच्वंगु तर थःपिनि पार्टीया मन्त्रीतय्सं अज्याःगु ज्या दिकेत छुं भूमिका म्हितेमफुगु धासें पार्टी नेतृत्वया ध्यानाकर्षण याःगु दु ।
सभासद्तय्सं सरकार परिवर्तनया खँ ल्ह्वनेवं संसदीया दलया नेता रामचन्द्र पौडेलं तत्काल सरकार परिवर्तन यायेगु पाखे वनेमज्यूगु धासें सरकारया बचाउ यानादिल । वय्कलं सरकार परिवर्तन यायेगु स्वां सरकारया गल्ती कमी-कमजोरी जूगु थासय् खबरदारी यायेमाःगु धयादिल ।
