प्राविधिक समितिं प्रतिवेदन तयार यायेमफुत

सेना समायोजन विशेष समिति अर्न्तगतया प्राविधिक समितिं आइतवाः विषेश समितियात थःगु प्रतिवेदन लःल्हायेत असफल जूगु दु । पुनःस्थापना जुइ चाहे जूपिं व सुरक्षाफौजय् वने चाहे जूपिं माओवादी लडाकुया निंतिं आवश्यक मापदण्ड निर्धारण यायेमफेवं प्राविधिक समितिं प्रतिवेदन तयार यायेमफुगु खः । थ्वस्वयां न्ह्यः विषेश समितिया बैठकं स्वन्हुया दुने कार्ययोजना दयेकाः प्रतिवेदन तयार यायेत प्राविधिक समितियात निर्देशन ब्यूगु खः ।

प्राविधिक समितिं प्रतिवेदन तयार यायेमफेवं आइतवाः च्वंगु विषेश समितिया बैठकय् लडाकु समायोजनया बारे सहलह जुइमफुत । विशेष समितिलय् कांग्रेस पाखें दुजः जुयादीम्ह डा. रामशरण महतं प्राविधिक समितिं थःगु प्रतिवेदन लःल्हामेफुगुलिं लडाकु पुनःस्थापना व समायोजनया विषयलय् आइतवाःया बैठकय् सहलह जुइमफुगु कनादिल ।

प्राविधिक समिति दुने माओवादी व मेमेगू थलं पुनःस्थापना जुइ चाहे जूपिं लडाकुतय्त छु कथंया सुविधा बीगु बारे सहमित यायेमफेवं प्रतिवेदन तयार यायेत थाकूगु खः । माओवादीं अज्याःपिं लडाकुतय्त प्रतिव्यक्ति नीगु लख तका बीमाःगु प्रस्ताव याःगु खःसा कांग्रेस व एमालें उकीयात अस्वीकार याःगु खः ।