अविश्वासया प्रस्ताव वयेफु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' सत्ता नेतृत्व यानाच्वंगु एमाले दुने हे सरकार परिवर्तनया निंतिं दबाव अप्वयावंगुलिं अविश्वासया प्रस्ताव दर्ता जुइफुगु खँ धयादीगु दु ।
आइतवाः थःगु हे छेँय् संचारकर्मीत नाप खँल्हाबंला यानादिसें वय्कलं एमाले दुने सरकार परिवर्तनया निंतिं हस्ताक्षर संकलन जुयाच्वंगु बुखँ प्रति संकेट यानादिसें बहुमत एमाले सभासद्तय्सं थुकी हस्ताक्षर याःसा सरकारया विरुद्ध अविश्वास प्रसताव ह्येगु आधार तय जुइगु कनादिल ।
आइतवाः च्वनीगु सेना समायोजन विषेश समितिया बैठक न्ह्यः संचारकर्मीत नाप खँल्हाबंला यानादिसें वय्कलं सेना समायोजनया निंतिं माओवादीं स्वंगू विकल्प प्रस्ताव याःगु कनादिल । वय्कलं सेनाय् वने चाहेजूपिं माओवादी लडाकुयात सेनाय् समायोजन यायेगु, जनसेनायात बिस्कं हे विशेष फोर्स दयेकाः तयेगु, अले लडाकुया हे ल्याख्य् नेपाली सेना, सशस्त्र व नेपाल प्रहरीयात मिले यानाः मेगू बिस्कं फोर्स दयेकेगु बारे सहलह जुयाच्वंगु कनादिल ।
वय्कलं राज्य पुनर्संरचना, सेना समायोजन व राज्यया शासकीय स्वरुपया बारे याकनं हे सहमति जुसाः इलय् हे संविधान निर्माण जुइगु धयादिसें राज्य पुनर्संरचनाया बारे सहमति जुसाः सेना समायोजन व शासकीय स्वरुपया बारे यांउक सहमति जुइगु दावी यानादिल ।
