यादव संसद पाखें सरकार क्व:थलेगु पक्षय्
मधेशी जनअधिकार फोरमया अध्यक्ष उपेन्द्र यादवं प्रधानमन्त्री माधवकुमार नेपालं राजीनामा मब्यूसाः संसद पाखें हे वय्क नेतृत्वया सरकार क्वःथलेगु दावी यानादीगु दु ।
फोरमया निक्वःगु चरणया आन्दोलन स्वरुप जिल्ला दौडाहलय् दीम्ह यादवं आइतवाः लहानय् ग्वसाःग्वःगु पत्रकार सम्मेलनय् नेपाल नेतृत्वया सरकार निरन्तर न्ह्याः वंसाः इलय् हे संविधान जारी मजुइगुलिं थ्व सरकारया नेतृत्व परिवर्तनया विकल्प मदुगु धयादिल ।
वय्कलं जेठ १४ गते संविधान जारी मजुसाः देय् अन्यौलय् लाइगु व अथे जुसाः देशय् न्ह्याःगु नं जुइफइगु ख्याच्व: बियादिल । देय्यात थप दुर्घटना पाखें बचे यायेत व राजनीतिक सहमतिया आधारय् राष्ट्रिय सरकार दयेकेगु वातावरण तयार यायेत प्रधानमन्त्री नेपालं राजीनामा बीमाःगु खँ वय्कलं धयादिल ।
अथेहे वय्कलं इया गति नापं राजसंस्थाया अस्तित्व नं समाप्त जुइधुंकूगुलिं राजसंस्था पुनः सक्रिय जुइगु सम्भावना मदुगु धयादिल । वय्कलं राजसंस्था व जुजुया बारे भावी पुस्तां लेखरचना व बाखँया कितावय् जक ब्वनेगु बाहेक मेगू विकल्प मदुगु धयादिल ।
