ज्ञानेन्द्र व भट्टराईयात सुभाय् : झा
उपराष्ट्रपति परमानन्द झां पुलांम्ह जुजु ज्ञानेन्द्र शाह व पुलांम्ह प्रधानमन्त्री कृष्णप्रसाद भट्टराईया लिप्पांगु अभिव्यक्तिया निंतिं वय्कपिंत सुभाय् देछानादीगु दु ।
आइतवाः सुथय् बाराया सिमरा विमानस्थलय् पत्रकारत नाप खँल्हाबंला यानादिसें वय्कलं नेतात थःगु कर्तव्य ल्वमंकाः च्वनाच्वंगु इलय् वःगु थंज्याःगु अभिव्यक्तिं नेतातय्त थःगु कर्तव्यबोध याकूगु व नेता सचेत जूगुलिं शाह व भट्टराईयात सुभाय् बियादिल । वय्कलं धयादिल, 'नेतातय्त सचेत यायेगु कथंया अभिव्यक्ति ब्यूगुलिं जिं पुलांम्ह जुजु व भट्टराईयात सुभाय् बी ।'
अथेहे वय्कलं राष्ट्रपति व उपराष्ट्रपतिया छुं नं अधिकार मुदगु धयादिसें संविधान इलय् हे जारी जुइ वा मजुइ छुं हे मस्यूगु धयादिल । वय्कलं राष्ट्रपति व उपराष्ट्रपतिं संविधानया पलना यायेगु बाहेक मेगू छुं ज्या मदुगु धयादिल ।
