राष्ट्रपति व प्रधानमन्त्री दथुइ खँल्हाबंला
राष्ट्रपति डा. रामवरण यादव व प्रधानमन्त्री माधवकुमार नेपाल दथुइ आइतवाः सुथय् खँल्हाबंला जूगु दु ।
राष्ट्रपति भवन शितल निवासय् जूगु खँल्हाबंलाय् प्रधानमन्त्री नेपालं राष्ट्रपतिया विवादास्पद अभिव्यक्तिया बारे च्यूता प्वंकादीगु ख: । लिस:लय् राष्ट्रपति यादवं थःम्हं संविधान पिने वनाः अभिव्यक्ति ब्यूगु धकाः पिहांवःगु बुखँत सत्य मजूगु धयादिल । वय्कलं सरकारं हे दय् संचालन याइगु धयादिसें कार्यकारी अधिकार प्रधानमनत्री याके हे दुगुलिं थःम्हं संविधान पिनें वनाः न्ववायेगु मफइगु धयादिल ।
राष्ट्रपति यादवं छुं दिं न्ह्यः स्याङजा व जनकपुरय् बियादीगु अभिव्यक्ति विवादय् लायेवं प्रधानमन्त्री नापया खँल्हाबंलाय् वय्कलं थः संवैधानिक प्रावधान कथं हे चलेजुइगु स्पष्ट यानादीगु खः । उगु इलय् प्रधानमन्त्री नेपालं राष्ट्रपतियात संवैधानिक दायरा दुने हे च्वना न्ववायेत सुझाव बियादीगु ख: ।
अथेहे खँल्हाबंलाय् थनिनिसें न्ह्याइगु संसदया हिउँदे अधिवेशन, शान्ति प्रकृया, संविधान निर्माण व प्रधानमन्त्रीं थीथी दलनाप यानादीगु परामर्शया बारे नं खँल्हाबंला जूगु खः ।
