थनिनिसें संसदया हिउँदे अधिवेशन
व्यवस्थापिका संसदया हिउँदे अधिवेश थौं न्हिनसिया प्यताः इलं निसें सुरु जुइत्यंगु दु । थुगु अधिवेशनय् सरकारं थीथी विधेयक ह्येगु तयारी यानाच्वंगु दुसाः प्रमुख प्रतिपक्षी दल एकीकृत नेकपा (माओवादी) व मेगू विपक्षी दल मधेशी जनअधिकार फोरम सरकारया विरुद्ध कडा रुपं प्रस्तुत जुइगु जूगु दु । तर विपक्षी दलतय्सं सरकारया विरुद्ध अविश्वासया प्रस्ताव दर्ता याइ वा मयाइगु खँ धा:सा: निश्चित मजुनी ।
थ्वहे दथुइ थुगु अधिवेशनय् सरकारं नीन्यागू विधेयक ह्येत्यंगु दु । सरकारं सत्य निरुपण व मेलमिलाप आयोग विधेयक, व्यक्ति बेपत्ता याइगु (कसुर व सजाय) विधेयक, विधायन समितिलय् विचाराधीन राष्ट्रिय मानवअधिकार आयोग ऐन संशोधन विधेयक अधिवेशनय् प्रस्तुत जुइ । अथेहे बैंक व वित्तीय संस्थासम्बन्धी विधेयक, जातीय भेदभाव व छुवाछूत (कसुर सजाय) विधेयक, कार्यस्थलय् जुइगु यौनजन्य व्यवहार निवारण विधेयक नं सरकारं संसदीय सचिवालयलय् दर्ता या:गु दु ।
अथेहे लुँया भन्सार दर अप्वकेत सरकारं जारी या:गु ‘आर्थिक (न्हापांगु संशोधन) अध्यादेश' नं अधिवेशनय् न्ह्यब्वइगु ज्याझ्व: दु ।
