'इलय् हे संविधान निर्माण यानाः कोइराला प्रति श्रद्धाञ्जली'
थीथी दलया शीर्ष नेतातय्सं इलय् हे संविधान निर्माण यानाः मदुम्ह कांग्रेस सभापति गिरिजाप्रसाद कोइराला प्रति श्रद्धाञ्जली देछायेगु प्रतिबद्धता प्वंकूगु दु ।
कांग्रेसया येँ, यल व ख्वप जिल्ला समितिं मंकाः रुपं शनिवा: ग्वसाःग्वःगु श्रद्धाञ्जली सभाय् प्रधानमन्त्री लगायत माओवादी अध्यक्ष पुष्पकमल दाहाल 'प्रचण्ड', कांग्रेस कार्यवहाक सभापति सुशील कोइराला, वरिष्ठ नेता शेरबहादुर देउवा, उपसभापति रामचन्द्र पौडेल, एमाले अध्यक्ष झलनाथ खनाल लगायत संविधानसभाय् दुथ्याःगु दक्वं दलया नेतातय्सं थ्व प्रतिबद्धता प्वंकूगु खः ।
सभायात सम्बोधन यानादिसें प्रधानमन्त्री माधवकुमार नेपालं कोइराला थःगु जीवन जःछि लोकतन्त्र व शान्तिया निंतिं लगे जूगु धयादिसें दक्वं मिलेजुया इलय् संविधान निर्माण यायेगु हे वय्क प्रतिया सच्चा श्रद्धाञ्जली जुइगु धयादिल । वय्कलं कोइरालाया अन्तिम इच्छा शान्ति प्रकृयायात पूवंकेगु व संविधान जारी यायेगु जूगु धयादिसें थुकीयात साकार यायेत सहमति, आपसी विश्वास व समझदारीया साथ न्ह्याः वनेमाःगु धयादिल ।
संविधानसभा अध्यक्ष सुवासचन्द्र नेम्वाङं कोइरालां देय् व जनतायात निरन्तर न्ह्यने यंकेगु ज्या यानादीगु धयादिसें जनआन्दोलनय् वय्कलं म्हितादीगु भूमिकां वय्कयता शिखर पुरुष दयेकूगु धयादिल । वय्कलं कोइरालां ल्ह्वंगु पलाःयात झीसं निरन्तरता बीफुसा जक वय्कप्रति सच्चा श्रद्धाञ्जली जुइगु धयादिल ।
सभायात सम्बोधन यानादिसें माओवादी अध्यक्ष प्रचण्डं छगू इलय् माओवादी व कोइराला दथुइ निषेध यायेगु अवस्थाय् थ्यंगु खँ लुमंकादिसें कोइरालाया अन्तिम दिं तक थ्यंगु इलय् थः व कोइराला दथुइ राजनीतिक स्वापू जक मखसें भावनात्मक स्वापू नं ब्वलंगु धयादिल । वय्कलं कोइरालां थःयात अप्व माया याःगु धयादिसें कोइरालाया प्रति सच्चा श्रद्धाञ्जलि देछायेगु खःसा कोइरालाया साहासिक जीवन पाखें पाठ स्यनाः शान्ति स्थापना व संविधान निर्माण यायेमाःगु धयादिल ।
एमाले अध्यक्ष झलनाथ खनालं कोइरालां धयादीगु संवाद, सहमति व सहकार्यया विकल्प आः नं मदुगु धयादिसें प्रमुख दलत दथुइ दुगु अन्तर द्वन्द्वयात थ्वहे लँपू पाखें चीकाः शान्ति प्रकृयायात पूवंकाः संविधान निर्माण यायेमाःगु धयादिल । खनालं इतिहासं झीगू ब्वलय् तयाब्यूगु दायित्व पूवंकेफइ या मफइगु धइगु लिसः स्वंगू प्रमुख दलतय्सं बीमाःगु धयादिल ।
अथेहे सभाय् कांग्रेसया स्वम्ह नेतात सुशील कोइराला, शेरबहादुर देउवा व रामचेन्द्र पौडेलं पार्टीयात छगू दयेकाः न्ह्याकेगु घोषणा याःगु दु । पार्टी दुने यक्व हे खँ मिले याये मानीगु जुसां थुली तःधंगु पार्टी गवलें नं एकता पाखें बिमुख मजुइगु धारणा नेतातय्सं प्वंकूगु खः । नपां नेतातय्सं कांग्रेस आः संस्थागत रुपं न्ह्यावनीगु व पार्टी दुने मूल्यांकन, अनुसासन व संस्थागत निणर्य जुइगु बिचाः प्वंकूगु खः ।
सभायात तराई मधेश लोकतान्त्रिक पार्टीया अध्यक्ष महन्त ठाकुर, राष्ट्रिय जनशक्ति प्रजातन्त्र पार्टीया अध्यक्ष सूर्यबहादुर थापा, राष्ट्रिय जनमोर्चाया अध्यक्ष चित्रबहादुर केसी, राप्रपा नेपालया अध्यक्ष कमल थापा, मालेया महसचिव सीपी मैनाली, कांग्रेस उपसभापति गोपालमान श्रेष्ठ, महामन्त्री विमलेन्द्र निधी, प्रकाशमान सिंह, केवी गुरुङ, प्रवक्ता अर्जुननरसिंह केसी लगायत नं सम्बोधन या:गु खः ।
उगु सभाय् कोइराला प्रति अन्तर्राष्ट्रिय ख्यलं छ्वःगु श्रद्धाञ्जली सन्देश ब्वनाः न्यंकूगु खः ।
