माओवादी व नेकपा (एकीकृत) दइगु एकीकरण
एकीकृत नेकपा (माओवादी) व नेकपा एकीकृत (सुवेदी पुचः) दथुइ शनिवाः पार्टी एकीकरण जूगु दु । शनिवाः येँया राष्ट्रिय सभागृहलय् जूगु छगू ज्याझ्वः दथुइ निगू पार्टी एकीकरण घोषणा याःगु खः ।
ज्याझ्वलय् न्ववानादिसें माओवादी अध्यक्ष पुष्पकमल दाहाल 'प्रचण्डं' आः तकया उपलब्धीया रक्षा यासें क्रान्तिकारी धारयात अझ बल्लाकेमाःगु खँय् बः बियादिल । वय्कलं छगू हे कन्युनिष्ट पार्टी दयेकेगु लक्ष्यया साथ पार्टी एकता जूगु धयादिसें पार्टीलय् अवसरवाद अप्वयावंगुलिं शुद्धिकरण व सर्वहाराकरण अभियान न्ह्याकेमाःगु धयादिल ।
एकीकृतया नेता नवराज सुवेदी अझ प्रतिगमनकारीतय्सं थीथी षड्यन्त्र यानच्वंगु धयादिसें थःपिं निरन्तर अज्याःगु शक्ति विरुद्ध ल्वानाच्वनीगु धयादिल । नापं वय्कलं राष्ट्रिय स्वाधिनताया पक्षय् व विदेशी हस्तक्षेप विरुद्ध नं सशक्त रुपं आन्दोलन यायेगु धयादिल ।
अथेहे ज्याझ्वलय् लिपाः एकता घोषणा विज्ञपति पिथंसें थ:पिं शान्ति व न्हूगु संविधान निर्माणया निंतिं राष्ट्रिय स्वाधीनताया रक्षा व नागरिक सर्वोच्चता बहाली, माओवादी नेतृत्वया राष्ट्रिय मंकाः सरकार अनिवार्य जूगु खँ स्पष्ट जूगु खँ न्ह्यथंनातःगु दु ।
