संघीयता व धर्म निरपेक्षता पाखें ल्यूने वनेफइमखु : नेम्वाङ

संविधानसभाया अध्यक्ष सुवासचन्द्र नेम्वाङं संघीयता व धर्म निरपेक्षता पाखें देय् ल्यूने वनेमफइगु खँ धयादीगु दु ।

आदिवासी जनजाति महासंघया न्हय्क्वःगु महाधिवेशनया शनिवाः येँय् उल्लेज्या यानादिसें वय्कलं जनताया इच्छा कथं देय् संघीयता व धर्म निरपक्षेताय् वंगु धयादिसें दक्वं पक्ष थुकीयात संस्थागत यायेगु ज्याय् लगेजुइमाःगु खँय् बः बियादिल । वय्कलं संघीय लोकतान्त्रिक गणतन्त्रयात संस्थागत यायेत आदिवासी जनजनतितय् भूमिका महत्वपूर्ण जुइगु नं धयादिल ।

ज्याझ्वलय् माओवादी सभासद् नापं महासंघया संस्थापन महासचिव सुरेश आले मगरं देय्यात हानं हिन्दु राज्य दयेकेत स्वःपिं व संघीयताया विरोध याइपिं दक्वं प्रतिगामीत जूगु द्वपं बियादिल ।

अथेहे संविधानसभाय् दुथ्याःगु जनजाति सभासद्तय् मंकाः संजाल ककसया संयोजक वर्षमान पुन 'अनन्तं' न्हूगु संविधानय् संघीय लोकतान्त्रि गणतन्त्रयात संस्थागत यायेत संविधानसभा दुने व्यापक दवाव बीगु धयादिल । ज्याझ्वलय् जनजाति अगुवातय्सं धर्म निरपेक्षता, संघीयता व गणतन्त्रया विपक्षय् प्रतिगामीतय्सं षड्यन्त्र यानाच्वंगु धासें आवश्यक जुसा: थंज्या:गु गतिविधिया विरुद्धय् कडा रुपं प्रस्तुत जुइगु ख्याच्व: ब्यूगु ख: ।

ज्याझ्व: सुरू जुइ न्ह्य: थीथी जनजातितय् झाँकी सहित सुन्धारां र्‍याली पिहांव:गु ख: । चैत २३ गते तक न्ह्याइगु थुगु महाधिवेशनं महासंघया न्हूगु नेतृत्व ल्यइगु जूगु दु ।