इतिहास लिहांवइमखु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' गिरिजाप्रसाद कोइरालाया निधन लिपा प्रतिगामी तत्वतय्सं फाइदा कायेत स्वःगु धयादिसें आः इतिहास लिहांमवइगु व न्हापाया ई हानं मवइगु दावी यानादिल ।
राष्ट्रिय निर्माण व्यवसायी संगठनया न्हापांगु राष्ट्रिय सम्मेलनया चितवनया सौराहालय् शनिवा: उल्लेज्या यानादिसें प्रचण्डं सरकारय् दुथ्याःपिं नेतातय्सं हे गणतन्त्र, संघीयता व धर्म निरपेक्षताया विरोध याःगु प्रति आपत्ति प्वंकादिसें आः छुनां चाहे जुसां नं थुकीयात परिवर्तन यायेमफइगु दावी यानादिल ।
थीथी ख्यलं वःगु अज्याःगु अभिव्यक्तियात संविधान विरोधीया संज्ञा वियादिसें गणतन्त्र, संघीयता व धर्म निरपेक्षताया बारे प्रमुख दलत दथुइ सहमति जुइधुंकू धयादिल । नापं वय्कलं थुकीयात संस्थागत यायेत दलत मिले जुयावनेगुया विकल्प मदुगु धयादिल ।
कोइरालाया अनुपस्थितिइ देय्या जिम्मे थःम्हं कायेगु धयादिसें माओवादी अध्यक्ष प्रचण्डं प्रतिगामी शक्तियात ठीक यायेत जेठ १४ दुने हे न्हूगु संविधान जारी यायेमाःगु धयादिल ।
