'संसदीय दलयात राजीनामा फ्वनेगु अधिकार मदु'
नेकपा (एमाले)या महासचिव ईश्वर पोखरेलं संसदीय दलयात प्रधानमन्त्रीया राजीनामा फ्वनेगु अधिकार मदुगु खँ धयादीगु दु । आइतवाः च्वनीगु एमालेया संसदीय दलया बैठकय् प्रधानमन्त्रीया राजीनामा फ्वनेगु हल्ला जुयाच्वंगु इलय् वय्कलं थुकीया बारे थःम्हं छुं नं मस्यूगु धयादिल ।
प्रेस चौतारी पाल्पां शनिवाः सुथय् तानसेनाय् ग्वसाःग्वःगु पत्रकार सम्मेलनय् वय्कलं संसदीय दलं प्रधानमन्त्रीया राजीनामा फ्वनेगु सहि लँपू मजूगु धयादिसें संसंदीय दलया दुजःतय्सं अथे मयाइगु धयादिल । नापं वय्कलं राजीनामा फ्वनेगु खःसा केन्द्रीय कमिटिया बैठकं निर्णय यायेमाःगु व थ्वहे जक सहि लँपू जुइगु धयादिल ।
वय्कल थ्व सरकारयात नीनिगू दलया समर्थन दुगुलिं माओवादीं सतकय् हाला जक सरकार परिवर्तन मजुइगु धयादिसें फुसाः बहुमत हयाः सरकार परिवर्तन यानाः क्यनेत माओवादीयात हाथ्या बियादिल । नापं वय्कलं सेना समायोजन व माओवादीया अर्ध सैनिक संरचना भंग मजुतल्ले वयात सरकारया नेतृत्व यायेगु ह्वताः मबीगु धयादिल ।
