सरकारं बैशाख ११ गते तःजिक लोकतन्त्र दिवस हनीगु
सरकारं ऐतिहासीक जनआन्दोलन २०६२-०६३ ताःलागु दिं बैशाख ११ गते भव्य व व्यवस्थीत रुपय् लोकतन्त्र दिवस हनेगु निर्णय याःगु दु । थौं सिंहदरवारय् प्रधानमन्त्रीया नायसुइ च्वंगु मुलसमारोह समितिया मुँज्यां दिवसया निंतिं स्वनिगः दुनेया महानगरपालीका नापं नगरपालीकायात राष्ट्रिय ध्वाँय् व व्यानर सफा यानाः सरसफाइ तच्वयेकेत निर्देशन बिइगु निर्णय याःगु दु ।
अथेहे बैशाख ११ गते सुन्धारय् च्वंगु धरहरां सूर्योदयनापं सेनां विगुल पुयाः तिंख्यलय् तोप तइगु जूगु दु । ज्ञात अज्ञात सहिदया आत्मा शान्तिया कामना यानाः थीथी थासय् पुजापाठ यायेगु व उगु हे दिं राष्ट्रपति डा. रामवरण यादवया मू पाहाँसुइ सैनीक मञ्चय् लोकतन्त्र दिवस हनीगु जूगु दु ।
दिवसया दिं देय्न्यंकंया सरकारी ज्याकू नापं विदेशस्थित कुटनीति नियोगय् दिपावली यायेगु नं मूल समारोह समितिं निर्णय याःगु दु । थुकिया निंतिं प्रधानमन्त्री माधवकुमार नेपालया नायसुइ मूल समारोह समिति गठन याःगु दु । मुँज्याय् ब्वति काःपिन्सं लोकतन्त्रया महान योद्धा गिरिजाप्रसाद कोइरालाया नामय् पार्क नापं स्मारक दयेकेत सरकारयात छ्याता तकं ब्यूगु दु ।
