झापाया तोपगाछीइ मिसा खलः
येँ (सन्ध्या टाइम्स)/झापाया तोपगाछी गाविसय् नेवाः मिस्त जानाः मिसा खलः गठन याःगु दु। उकिया नां 'नेवाः देय् दबू मिसा खलः, तोपगाछी झापा' धकाः तःगु दु। नेवाः देय् दबू झापा जिल्लाया नायः कृष्ण उदास मू पाहां कथं छगू ज्याझ्वःया दथुइ उगु मिसा खलः स्वनेगु ज्या जूगु खः। ज्याझ्वलय् न्ववासें मूपाहां उदासं झापाया गाविसय् थथे मिसा खलः नीस्वंगु थ्वहे न्हापांखुसी जूगुलिं मेमेगु गाविसतय्सं नं थ्वपाखें प्रेरणा कायेमाः धयादिल। अथे हे जिल्ला दुजः गंगा श्रेष्ठं नेवाः म्हसीका ल्यंका तयेत न्ह्यागु ज्याझ्वलय् वंसां नेवाः मिस्तय्सं नेवाः वसः हे पुना वनेत इनाप यानादिल। मुँज्या नेत्र श्रेष्ठया सभापतित्वय् जूगु खः।
मुँज्यां रोजिना जोशीया अध्यक्षताय् उगु मिसा खलः स्वंगु खः। उकिया न्वकु मेनका श्रेष्ठ, छ्यांज्ये सरस्वती श्रेष्ठ, लिउ छ्यांज्ये गंगा श्रेष्ठ, दांभरि माया श्रेष्ठ, दुजलय् मिना श्रेष्ठ व अम्बिका श्रेष्ठ च्वनादीगु दु। सल्लाहकारय् मिथिला कर्माचार्य व रेवती श्रेष्ठ च्वनादीगु दु ।
थ्वहे झ्वलय् नेवाः देय् दबू झापा जिल्ला समन्वय परिषदं देय् दबूया न्हापांम्ह नायः भक्तिदास श्रेष्ठ मदुगु दुःखय् शोक प्रस्ताव पारित याःगु दु। वय्कःया लुमंतिइ छगू मिनेट मौन धारण यासें परिषद्या बैठक न्ह्याकूगु खः ।
