'सरकारं यानाः हे चिट् खुइमाःगु'
येँ (सन्ध्या टाइम्स)/म्हिगःनिसें क्वचाःगु एसएलसी परिक्षायात व्यवस्थित यायेत सरकारी निकाय कडा रुपं लगे जुयाच्वंसां पिने जिल्लाया गुलिखे विद्यार्थीतय्सं धाःसा सरकारया हे कारणं यानाः थःपिंसं एसएलसी जाँच खुयाः पास यायेगु बाहेक मेगु विकल्प मदुगु तर्क न्ह्यःने हःगु दु।
विद्यार्थीतय्सं थुकिया न्हापांगु कारण इलय् सफू मथ्यनीगुयात बिउगु दु। थुगुसी नं एसएलसीइ ब्वनेमाःगु सफूत जाँच स्वयां निला न्ह्यः तिनि थःपिनि ल्हातय् लाःगु खँ न्ह्यथँसें उमिसं न्ह्यसः तःगु दु, 'माःगु सफू चाहिं व्यवस्थित रुपं वितरण मयायेगु अले जाँच जक व्यवस्थित यायेगु धयां जी ला?'
अथे हे गबलें हडताल, गबलें बन्द व गबलें चाहिं शिक्षकतय् पेन डाउनं यानाः नियमित कक्षा तकं गबलें हे बांलाक मजूगुयात नं विद्यार्थीतय्सं मेगु कारणया रुपय् न्ह्यःने हःगु दु। शहरय् बन्द हडताल जूसां विशेष कक्षा कयाः कोर्श पूरा याइ तर गामय् अज्याःगु छुं व्यवस्था मदुगुलिं विद्यार्थीतय् ब्वनेगु ज्या तसकं प्रभावित जुयाच्वंगु नं उमिगु द्वपं दु।
उकथं हे लोडशेडिङ्गं यानाः थःपिंसं माःगु इलय् ब्वने मखं धइगु नं विद्यार्थीतय् गुनासो दु। मत मदयाः बांलाक ब्वने मखंगुलिं एसएलसीया लागिं बांलाःगु तयारी याये मफुगुलिं नं थःपिं चिट्य् निर्भर जुइमाःगु उमिगु तर्क दु ।
वास्तवय् थज्याःगु समस्यां यानाः नं सम्बन्धित विषयया शिक्षकत थःगु विषयय् विद्यार्थी पास जुइमा धकाः थः हे चिट दयेकेत लगे जुयाच्वंगु खँ धाःगु दु ।
