नेपाःमितय् व्यक्तिगत विवरण भारतयात
येँ (सन्ध्या टाइम्स)/मेशिनं ब्वने फइगु पासपोर्ट दयेकेगु नामय् सम्पूर्ण नेपाःमितय् व्यक्तिगत विवरण भारतया ल्हातय् वंगु दु। नेपाःमितय् वहे व्यक्तिगत विवरण थःगु ल्हातय् लायेमा धकाः हे भारतं नेपाःया मेशिनं ब्वने फइगु (मेशिन रिडेबल) पासपोर्ट थःपिंसं छापे याना बी धकाः दवाव हे बिया हःगु खः। भारतया कडा दवावं यानाः सरकार उगु ज्या भारतयात बीत बाध्य जूगु खः। नेपाःमितय् थ्व व्यक्तिगत विवरण थःगु ल्हातय् लाये सातकि कन्हय् सुं नं नेपाःमियात ज्वने माल धाःसा भारतं तप्यंक वयागु छेँय् हे वनाः छापा मारे याये तकं फइगु खँ विज्ञतय्सं धाःगु दु।
थज्याःगु संवेदनशील सामग्री भारतयात लःल्हाये न्ह्यः सामान्य कथंया छुं सम्झौता छगू तकं मयाःगु खँय् धाःसा विज्ञ सूत्रं आश्चर्य प्वंकूगु दु। सूत्रया कथं थज्याःगु संवेदनशील ज्या भारतयात बिल धकाः मेगु जःलाखःला देय् चीन तकं तम्वयाच्वंगु दु ।
उखे आइकाओपाखें बियातःगु म्याद म्हिगः १ अप्रिलंनिसें क्वचाःगु जुयाः मेशिनं ब्वने फइगु बाहेक मेगु पासपोर्ट आः विश्वय् गनं हे वनेत ज्या मवइगु जूगु दु। थुकियात ध्यानय् तयाः नेपालं आइकाओयात नेपाः थेंज्याःगु देशया समस्यायात ध्यानय् तयाः थ्व म्याद छुं भचा अप्वयेकेत इनाप याःगु दु ।
लिसें भारतयात नं मेशिनं ब्वने फइगु थ्व पासपोर्ट छुं भचा प्रति जूसां याकनं छ्वया हयेत नेपालं इनाप याना छ्वःगु दु। पूरा पासपोर्ट छापे यायेत निला बीगु खँ धाःगु दु ।
