हत्याकाण्डय् सेना हे दोषी: आयोग
येँ (सन्ध्या टाइम्स)/बर्दियाया बासपानी धाःगु जंगल दुने स्वम्ह दलित मिस्तय्त स्याःगु घटनाय् अन दुने सेना हे दोषी जूगु खँ राष्ट्रिय मानव अधिकार आयोगं नं ठहर याःगु दु। घटनाया छानबिन लिपा आयोगं म्हिगः थःपिनि प्रतिवेदन सार्वजनिक यासें उगु घटनाय् जंगलय् सिमाया ख्वला मुं वयाच्वंपिं स्वम्ह मिस्तय्त सेनाया पुचलं ज्वनाः गोलीं कयेकाः स्याःगु व सीपिं मिस्त शिकारी मखुगु ठहर याःगु दु।
लिसें सीपिं मिस्तय्त बलात्कार याःगु धकाः खँ वयाच्वंसां उमित बलात्कार याःगु खने मदु धासें प्रतिवेदनय् तर उमित ज्वनेधुंकाः बल प्रयोग यानाः स्याःगु धाःसा खनेदु धयातःगु दु। प्रतिवेदनय् दोषी सैनिकतय्त कारवाही यायेमाःगु सीपिनि छेँजःयात म्हतिं स्वंगू लाख क्षतिपूर्ति बीमाःगु लिसें उमि मस्तय्त ब्वनेगु व्यवस्था सरकारं याना बीमाः धकाः नं सिफारिस याना तःगु दु ।
उगु घटनाय् लानाः स्थानीय देवीसरा विक, अमृता बिक व चन्द्रकला विक सीगु खः। थ्व घटनाय् सेना हे दोषी खः धकाः मेमेगु निकायतय्सं नं छानबिन यानाः धायेधुंकूगु दु तर सरकारं आः तक दोषी सेनायात कारवाही धाःसा याःगु मदुनि ।
