लिम्वुवानी सहिदयात १० लाख क्षतिपूर्ति
येँ (सन्ध्या टाइम्स)/लिम्बुवान विद्यार्थी आन्दोलनया झ्वलय् झापाया धुलाबारीइ प्रहरीया गोलीं कयाः सीम्ह विद्यार्थी कार्यकर्ता मनिल तामांगया छेँजःयात सरकारं १० लाख तका क्षतिपूर्ति बीगु निर्णय याःगु दु। तामांगयात लिम्बुवानी विद्यार्थी आन्दोलनया न्हापांगु सहिद माने यानातःगु दु। सरकारं नं तामांगयात सहिद घोषणा यायेधुंकूगु दु ।
संघीय लोकतान्त्रिक राष्ट्रिय मञ्च सम्बद्ध संघीय लिम्बुवान राज्य परिषद अन्तर्गतया भ्रातृ संगठन संघीय विद्यार्थी युनियन लिम्बुवान राज्य परिषद सहिद तामांगया छेँजःयात १० लाख तकाः क्षतिपूर्ति बीमाः धइगु माग यासें वंगु छुं ई न्ह्यवंनिसें आन्दोलन याना वयाच्वंगु खः ।
तामांग झापाया पृथ्वीनगरय् २०४९ साल मंसीर २ गते जन्म जूम्ह लिम्बुवान निवासी खः। वय्कःयात सहिद घोषणा याकेत परिषदं लिम्बुवान बन्दया समेत घोषणा याना तःगु खः ।
