पुनर्संरचना आयोगया कार्यविधि बारे विवाद
प्रमुख स्वंगू राजनीतिक दलत दुथ्याःगु उच्चस्तरीय राजनीतिक संयन्त्रं राज्य पुनर्संरचना आयोग गठन यायेगु सैद्धान्तिक सहमति प्वंकूसां थुकीया कार्यविधिया बारे विवाद जूगु दु । थुकी विवाद जुइवं एमालेया संसदीय दलया ज्याकूथीइ शुक्रवाः च्वंगु संयन्त्रया बैठक बिना निष्कर्ष क्वचाःगु दु ।
एमाले अध्यक्ष झलनाथ खनालया सभापतित्वय् शुक्रवाः च्वंगु बैठकय् आयोग गठन यायेगु निर्णय जूगु खःसां कार्यविधि व समयसीमाया बोर सहमित मजुइवं आयोग गठन जुइमफुगु खः । अथेहे बैठकय् आयोगया दुजःतय् नां बारे सहलह जूगु खःसां थुकी नं सहमति जुइमफुगु खँ धाःगु दु ।
बैठक लिपाः कांग्रेस संसदीय दलया नेता रामचन्द्र पौडेलं थुकीया बारे आइतवाः च्वनीगु बैठकं निर्णय याइगु धयादिल । अथेहे माओवादी उपाध्यक्ष नारायणकाजी श्रेष्ठं 'प्रकाशं' आयोगया कार्यविधि व समयसीमाया बारे सहलह जुसां सहमति जुइमफुगु धयादिल ।
